الماتى اۋەجايىندا كولىك كەپتەلىسى ماسەلەسى قاشان شەشىلەدى
«وزدەرىڭىز بىلەتىندەي، كولىك تۇراعىنداعى ادامدار اعىنى - اۋەجايدىڭ باستى ماسەلەلەرىنىڭ ءبىرى. قازىرگى تاڭدا پاندۋس قايتا سالىنىپ جاتىر. سول سەبەپتى ۇشىپ شىعۋ جولدارىنا اپاراتىن جول جابىق. پاندۋستىڭ رەكونسترۋكتسياسىن بيىل شىلدە-تامىز ايلارىندا اياقتاۋدى كوزدەپ وتىرمىز. وسىدان سوڭ حالىقارالىق رەيستەرگە پايدالانىلاتىن جاڭا پاندۋستى سالۋ جوسپارلانعان»، - دەدى الىپ ەر تۇنعا ەرسوي.
سپيكەر كەپتەلىس ماسەلەسى كەلەسى جىلى بارلىق جوبالار اياقتالعان سوڭ شەشىمىن تاباتىنىن جەتكىزدى.
«ۇشاق ۇشاتىن جەرگە جولدى اشقان كەزدە، ماسەلە شەشىمىن تابادى. سەبەبى، ۇشۋ ايماقتارىنا باراتىن بالاما جول پايدا بولادى. جاڭا VIP- تەرمينالدىڭ قۇرىلىسى اياقتالعان سوڭ، وڭتۇستىك VIP- ءتىڭ الاڭدارى تۇراق ءۇشىن پايدالانىلاتىن بولادى. ەكىنشى پاندۋستىڭ قۇرىلىسى اياقتالعان سوڭ، تۇراق كەڭەيتىلەدى. جالپى، الداعى ۋاقىتتا اۋەجايداعى تۇراق، كەپتەلىس ماسەلەسى شەشىمىن تاباتىن بولادى دەپ ويلايمىن»، - دەدى ول.
سونداي-اق الىپ ەر تۇنعا ەرسويدىڭ ايتۋىنشا، الماتى اۋەجايىنىڭ جاڭا تەرمينالىنىڭ قۇرىلىسى بۇگىنگى كۇنى %53 اياقتالعان. تەرمينالدى كەلەسى 2024-جىلى جازدا تاپسىرۋ جوسپارلانعان.
سونداي-اق اۋە ايلاعىنىڭ باسشىسى الماتى اۋەجايىنىڭ اۋماعىندا تاكسي تاسىمالىمەن زاڭسىز اينالاسۋ پروبلەماسىنا قاتىستى ايتتى.
«اۋەجاي اۋماعىندا جۇرەتىن زاڭسىز تاكسيلەر - ءبىزدىڭ كەزەكتى پروبلەمانىڭ ءبىرى. وكىنىشكە قاراي، اۋەجاي اۋماعىنداعى جەكە تاسىمالداۋدى رەتتەۋ مەملەكەتتىك ورگانداردىڭ قۇزىرەتىنە كىرەدى. ءبىز پوليتسيامەن ءجيى حابارلاسىپ تۇرامىز. ماسەلەلەر تۋىنداسا، ءبىز ۇنەمى ولارعا حابارلاسامىز. تاعى قايتالاپ ايتايىن، ول ءبىزدىڭ قۇزىرەتىمىزگە كىرمەيدى. ءبىراق، ءبىز قولدان كەلەتىن بارلىق شارالاردى جاساۋدامىز. مەن ادامداردى تاسىمالداۋمەن اينالىساتىن جەكە كومپانيا بولعانى ءۇشىن، كولىكتەر ءبىر ستاندارتتا، جۇرگىزۋشىلەر ءبىر ۋنيفورمادا، جولاۋشىلارعا قولايلى جاعدايدى قامتاماسىز ەتۋ ماقساتىندا تاكسوپاركتاردىڭ وكىلدەرىمەن كەزدەستىم، ءبارىن رەسمي تۇردە راسىمدەۋگە ۇسىندىم. وكىنىشكە وراي، ءبىز ءالى كونسەنسۋسقا جەتكەن جوقپىز»، - دەدى الىپ ەر تۇنعا ەرسوي.
