قازاقستاننىڭ جاڭا ەكونوميكالىق ساياساتى بەكىتىلدى
«الەمدەگى گەوساياسي جاعدايدىڭ ناشارلاۋى، ساياسي جانە اسكەري شيەلەنىستەر، سانكتسيالىق قاقتىعىستار، پاندەميانىڭ سالدارى الەمنىڭ جاڭا ساياسي جانە ەكونوميكالىق گەوگرافياسىن قالىپتاستىرۋ پروتسەسىنە تۇرتكى بولدى. وسىنىڭ اياسىندا حالىقارالىق ينستيتۋتتار الەمدىك ەكونوميكا باياۋلايدى جانە جاھاندىق رەتسەسسيا تاۋەكەلدەرى تۋىندايدى دەپ بولجاپ وتىر. بۇل رەتتە قازاقستان ەكونوميكاسىندا ونىڭ دامۋىن تەجەپ، الەۋمەتتىك شيەلەنىستىڭ وسۋىنە اكەلۋگە قابىلەتتى جۇيەلى پروبلەمالار ساقتالىپ وتىر. دامۋعا جاڭا سەرپىن بەرۋ ءۇشىن ەكونوميكالىق ساياساتتىڭ قاعيداتتارى مەن تەتىكتەرىن قايتادان وي سۇزگىسىنەن وتكىزۋ، ونىڭ بولجامدىلىعىن قامتاماسىز ەتۋ، كاسىپكەرلىك قىزمەتتى ىنتالاندىرۋ ماقساتىندا مەملەكەتتىڭ ءرولىن ايقىنداۋ جانە «ويىن قاعيدالارىن» قايتا رەتتەۋ تالاپ ەتىلەدى»، - دەلىنگەن قۇجاتتا.
جاڭا ەكونوميكالىق ساياسات كىرىستەردى ءادىل بولە وتىرىپ، سول ارقىلى ازاماتتاردىڭ ءومىر ءسۇرۋ دەڭگەيىن كوتەرىپ، ينكليۋزيۆتى ەكونوميكا قۇرۋعا باعىتتالعان.
«ەكونوميكالىق ساياساتتىڭ ماقساتى - ۇلتتىق تابىس دەڭگەيىنىڭ ناقتى ۇلعايۋىن قامتاماسىز ەتۋگە قابىلەتتى ورنىقتى، ساپالى جانە ينكليۋزيۆتى ەكونوميكالىق ءوسۋ. ەكونوميكالىق ساياساتتى ىسكە اسىرۋدىڭ ىرگەلى شارتى زاڭ ۇستەمدىگىنە جان-جاقتى كەپىلدىك بەرۋ بولادى. ەكونوميكالىق ساياسات بارلىق ەكونوميكالىق اگەنتتەر مەن ازاماتتاردىڭ الەۋەتىن بارىنشا اشۋ ءۇشىن ادىلدىك پەن مۇمكىندىكتەر تەڭدىگىن قامتاماسىز ەتۋگە باعىتتالادى»، - دەپ جازىلعان ورتا مەرزىمدى ەكونوميكالىق دامۋ جوسپارىندا.
جاڭا ەكونوميكالىق ساياساتتىڭ باسىم باعىتتارى:
- جەكەمەنشىككە قول سۇعۋعا جول بەرمەۋ؛
- قابىلداناتىن شەشىمدەردىڭ اشىقتىعى؛
- ادال باسەكەلەستىك؛
- مەملەكەتتىك ساياساتتىڭ بولجامدىلىعى؛
- بيزنەستىڭ سالىقتىق ادالدىعى؛
- كاسىپكەرلەردىڭ الەۋمەتتىك جاۋاپكەرشىلىگى بولادى.
قۇجاتتا جازىلعانداي، قولعا الىناتىن جوبالار اياسىندا مەملەكەتتىڭ ەكونوميكاعا قاتىسۋ ۇلەسى جوسپارلى تۇردە قىسقارادى جانە قولايلى كاسىپكەرلىك ورتا قۇرۋعا باسا نازار اۋدارىلادى.
«جاڭا ەكونوميكالىق ساياسات مونوپولياعا قارسى زاڭناما ەرەجەلەرىنىڭ ءىس جۇزىندە تولىق ساقتالۋىن قامتاماسىز ەتەدى. ەكونوميكالىق ىنتالاندىرۋلاردىڭ بۇرمالانۋىنا جانە نارىقتىق جاعدايلاردىڭ دەفورماتسيالانۋىنا اكەلەتىن پراكتيكالار جويىلادى. بۇل ەڭ الدىمەن، جەتەكشى ءرولدى جەكە سەكتور اتقاراتىن جاپپاي كاسىپكەرلىككە نەگىزدەلگەن، وليگوپوليالار مەن وليگارحياعا تاۋەلدى ەمەس ەكونوميكالىق جۇيە قۇرۋعا مۇمكىندىك بەرەدى»، - دەپ كورسەتىلگەن قۇجاتتا.
بەكىتىلگەن جاڭا ەكونوميكالىق ساياساتتى ىسكە اسىرۋ شەڭبەرىندە ءوسىم جالپى ىشكى ونىممەن عانا ەمەس، سونىمەن بىرگە ساپالى جۇمىس ورىندارىن قۇرۋ جانە ازاماتتاردىڭ ناقتى كىرىستەرىن ۇلعايتۋ بويىنشا باعالانادى.
