پرەزيدەنتكە سىيعا تارتىلعان ناۋرىز اتتى كۇشىك قالاي ءوسىپ جاتىر
بۇل كۇشىكتى قاسىم-جومارت توقايەۆقا وسى جىلدىڭ ناۋرىز ايىندا ناۋرىز مەيرامى قارساڭىندا استاناداعى يتتەر كورمەسىندە سىيلاعان بولاتىن. بۇل كەزدە تازى كۇشىكتى پرەزيدەنتكە اسىل تۇقىمدى ءيت ءوسىرۋشى اننا زاحاروۆا بەردى.
«ول قازىر سەبەتتەگى دىرىلدەپ جاتقان كىشكەنتاي كۇشىك ەمەس، قازىر ودان كوز الماي باقىلاۋ كەرەك. تەنتەك كۇشىك. ءبىز مىندەتتى تۇردە ونىڭ العاشقى اڭشىلىعىن، ونىڭ جەتىستىگى مەن ءوسۋىن كورسەتەمىز. كىم بىلگەن، مۇمكىن ول ءبىر كۇنى اقوردانى جەكە قورعاۋىنا الار؟!»، - دەلىنگەن جازبادا.
بۇعان دەيىن مەملەكەت باسشىسى تازى جانە توبەت تۇقىمدارىن ساقتاۋ تۋرالى زاڭعا قول قويعان بولاتىن. مەملەكەت باسشىسى تازىنى حالىقارالىق دەڭگەيدە دارىپتەۋ قاجەتتىگىن ايتتى.
«قۇماي تازى - ەرەكشە جانۋار، قازاقتىڭ جەتى قازىناسىنىڭ ءبىرى. ءبىز تازى مەن توبەتتى حالىقارالىق دەڭگەيدە كەڭىرەك دارىپتەۋىمىز كەرەك. سىرتقى ىستەر مينيسترلىگى دە مىندەتتى تۇردە اتسالىسۋى قاجەت. تازىعا ەرەكشە كۇتىم، قامقورلىق كەرەك. بۇل ماڭىزدى ءىس كاسىبيلىكتى تالاپ ەتەدى. سول ءۇشىن ارنايى زاڭ قابىلدادىق»، - دەدى قاسىم-جومارت توقايەۆ.
