مينيستر مەديتسينا قىزمەتكەرلەرىن ساقتاندىرۋ تەتىگىنە تۇسىنىك بەردى

استانا. قازاقپارات - دەنساۋلىق ساقتاۋ ءمينيسترى اجار عينيات مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ تەتىگىنە تۇسىنىك بەردى، دەپ حابارلايدى قازاقپارات ءتىلشىسى.

ەلىمىزدە دارىگەردىڭ كاسىبي جاۋاپكەرشىلىگىنە قاتىستى مىندەتتى ساقتاندىرۋ جۇيەسى ەنگىزىلمەك.

ا. عينياتتىڭ ايتۋىنشا، مينيسترلىك مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋدىڭ ءتۇرلى مودەلدەرىنە تالداۋ جۇرگىزدى.

«حالىقارالىق تاجىريبەدە مەديتسينا قىزمەتكەرلەرىن قورعاۋ ءۇشىن ءتيىستى قورلار مەن قاۋىمداستىقتار (شۆەتسيا، كانادا، دانيا) قۇرۋ، سونداي-اق جەكە نارىقتار (ا ق ش، گەرمانيا، جاپونيا، تۇركيا) ارقىلى كاسىپتىك جاۋاپكەرشىلىكتى مىندەتتى ساقتاندىرۋ جۇيەسى قولدانىلادى. حالىقارالىق تاجىريبەگە سۇيەنە وتىرىپ، مەديتسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋدىڭ وڭتايلى تەتىگى رەتىندە شۆەتسيا، كانادا، ا ق ش، جاپونيا جانە تۇركيا مودەلدەرى بويىنشا بەيىمدەلگەن نارىقتىق ساقتاندىرۋ مودەلىن قولدانۋدى ۇسىنىپ وتىرمىز»، - دەدى ا. عينيات ماجىلىستە جاڭادان سايلانعان دەپۋتاتتار الدىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرۋ كەزىندە.

سونىمەن قاتار، ول 2017-جىلى مينيسترلىك مەملەكەت باسشىسىنىڭ تاپسىرماسى بويىنشا دەربەس كەپىلدىك بەرۋ قورىن قۇرۋ اياسىندا ىنتىماقتاستىق قاعيداتى بويىنشا ساقتاندىرۋدىڭ الەۋمەتتىك مودەلىن ۇسىنعانىن ەسكە سالدى (جارنا مولشەرىن مەديتسينالىق ۇيىمعا - %50، مەديتسينا قىزمەتكەرىنە - %50 دەپ ءبولۋ). الايدا، زاڭ جوباسى قولداۋ تاپپاي، قابىلدانبادى.

«حالىقارالىق تاجىريبەنى تالداۋدىڭ نەگىزىندە، سونداي-اق جۇرتشىلىقتىڭ، مەملەكەتتىك ورگانداردىڭ جانە ساقتاندىرۋ كومپانيالارىنىڭ قاتىسۋىمەن ءتيىستى تالقىلاۋلار بولدى. بۇل تۇرعىدا جۇمىس ىستەپ تۇرعان ساقتاندىرۋ كومپانيالارى ارقىلى مەديتسينا قىزمەتكەرلەرى كاسىپتىك جاۋاپكەرشىلىگىنىڭ جۇكتەلگەن ساقتاندىرۋ مودەلى قابىلداندى. جۇمىس بەرۋشى - مەديتسينالىق ۇيىم ساقتانۋشى بولادى. بولاشاقتا مەديتسينا قىزمەتكەرلەرىن ليتسەنزيالاۋدى ەنگىزگەننەن كەيىن، مەديتسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋ جۇيەسىنە قاتىسۋشىلاردىڭ جاۋاپكەرشىلىگىن بولۋگە مۇمكىندىك بەرەدى»، - دەدى مينيستر.

ا. عينياتتىڭ سوزىنە قاراعاندا، وسى مودەلگە سايكەس شاعىمدى قاراعان كەزدە مەديتسينالىق ۇيىم مەدياتسيا ەلەمەنتتەرىن قولدانىپ، سونداي-اق مەديتسينالىق قاۋىمداستىقتاردى تارتا وتىرىپ، ىشكى اۋديت قىزمەتىنىڭ دەڭگەيىندە جۇزەگە اسىرادى. بۇل كەزەڭدە ماسەلە مەديتسينالىق ۇيىمنىڭ وزىندە رەتتەلۋى مۇمكىن. ءتيىستى كوميسسيا ناۋقاستىڭ دەنساۋلىعىنا زيان كەلتىرىلدى دەگەن شەشىم جاساسا، وسى ورايدا پاتسيەنتكە تولەم جاساۋ ءۇشىن ساقتاندىرۋ كومپانياسىنا جولداما بەرىلەدى.

«ەگەر پاتسيەنت كوميسسيانىڭ شەشىمىمەن كەلىسپەگەن جاعدايدا، شاعىم ساراپتامالىق قورىتىندى بەرۋ ءۇشىن مەديتسينالىق جانە فارماتسيەۆتيكالىق باقىلاۋ كوميتەتىنە تاپسىرىلادى. وڭ ناتيجە شىعارىلعان جاعدايدا، شاعىم بويىنشا ماتەريالدار، ونىڭ ىشىندە سوت-مەديتسينالىق ساراپتامانىڭ قورىتىندىسى مەديتسينالىق ۇيىم ساقتاندىرىلعان ساقتاندىرۋ كومپانياسىنا بەرىلەدى. ول جەردە پاتسيەنتكە كەلتىرىلگەن زيان ءۇشىن وتەماقى تولەۋدى دەنساۋلىق ساقتاۋ مينيسترلىگى ايقىنداعان قاعيدالار بويىنشا ساقتاندىرۋ كومپانياسى جۇرگىزەدى. تولەمنەن باس تارتقان جانە شەشىمگە قاناعاتتانباعان جاعدايدا، پاتسيەنت سوتقا جۇگىنۋگە قۇقىلى»، - دەدى ا. عينيات.

زاڭ قابىلدانعاننان باستاپ ساقتاندىرۋدى جۇمىس بەرۋشىنىڭ ەسەبىنەن جۇزەگە اسىرۋ ۇسىنىلىپ وتىر.

«ال، 2025-جىلدان باستاپ ساقتاندىرۋ سىياقىسىنىڭ سوماسىن مەديتسينالىق ۇيىم مەن مەديتسينا قىزمەتكەرلەرىنىڭ اراسىندا ءبولۋ ۇسىنىلدى. بۇل ءوز كەزەگىندە ورتاق كاسىپتىك جاۋاپكەرشىلىككە اكەلەدى»، - دەدى مينيستر.

ونىڭ اتاپ وتۋىنشە، كاسىپتىك جاۋاپكەرشىلىكتى ساقتاندىرۋ جۇيەسىمەن 304 مىڭنان استام مەديتسينا قىزمەتكەرىن قامتۋ ۇسىنىلدى.

بۇدان بۇرىن حابارلانعانداي، اجار عينيات مەديتسينا قىزمەتكەرلەرىنە قاتىستى قوزعالعان قىلمىستىق ىستەر تۋرالى ايتتى.