ازيا چەمپيوناتىندا جەڭگەن بالۋاندار قانشا كولەمدە اقشالاي سىياقى الادى

استانا. قازاقپارات - استاناداعى ازيا چەمپيوناتىندا جەڭىسكە جەتكەن بالۋاندارعا قانشا سىياقى بەرىلەدى؟

بۇل ساۋالعا مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارى ايگۇل بەكتەنوۆا جاۋاپ بەردى، دەپ حابارلايدى قازاقپارات ءتىلشىسى.

«بۇل جارىستا ءۇش كۇرەس تۇرىنەن ەلىمىزدىڭ نامىسىن 30 سپورتشى قورعايدى. ولاردىڭ ورتا جاسى گرەك-ريم كۇرەسىنەن - 29 جاس، ايەلدەر كۇرەسىنەن - 25 جاس جانە ەركىن كۇرەستەن - 24 جاس بولىپ كەلەدى»، - دەدى كوميتەت وكىلى ورتالىق كوممۋنيكاتسيالار قىزمەتىندە وتكەن بريفينگىدە.

سونداي-اق، ول چەميپونات جۇلدەگەرلەرىنە بەرىلەتىن اقشالاي سىيلىقتىڭ كولەمىن اتادى.

«ازيا چەمپيوناتىنان ءبىرىنشى ورىن العان سپورتشىلارعا 2300 دوللار، ەكىنشى ورىن العاندارعا 1400 دوللار جانە ءۇشىنشى ورىن العان سپورتشىعا 900 دوللار سىياقى قاراستىرىلعان. وسىنداي سىياقى جاتتىقتىرۋشىلارعا دا بەرىلمەك. سونىمەن قاتار، «حالىقارالىق دارەجەدەگى سپورت شەبەرى» دەگەن اتاق قاراستىرىلعان.

بۇعان دەيىن حابارلاعانىمىزداي، 9-14- ءساۋىر ارالىعىندا استانادا گرەك-ريم، ەركىن جانە ايەلدەر كۇرەسىنەن وتەتىن 36-ازيا چەميپوناتىنا قۇرلىقتىڭ 24 ەلىنەن 300 دەن استام بالۋان قاتىسپاق.