ءپىرماتوۆ: ينفلياتسيا تۇراقتى تومەندەپ كەلەدى دەپ ايتۋعا ءالى ەرتە
«ەلىمىزدىڭ ينفلياتسيالىق پروتسەستەرىندەگى ءبىز كۇتكەن كەيبىر وڭ ترەندتەرگە قاراماستان، ينفلياتسيا تۇراقتى تومەندەپ كەلەدى دەپ ايتۋعا ءالى ەرتە. تاۋەكەلدەر بالانسى پروينفلياتسيالىق جاققا ىعىسقان كۇيىن ساقتاپ وتىر. بۇعان جوعارى جانە قىسقا مەرزىمدى باعا شوكتارىنا سەزىمتال ينفلياتسيالىق كۇتۋلەر ىقپال ەتەدى. سونىمەن قاتار رەتتەلەتىن تاۋارلار مەن قىزمەتتەرگە باعانىڭ ءوسۋى ناتيجەسىندە ينفلياتسيانىڭ جەدەلدەۋ تاۋەكەلى ىسكە اسىرىلا باستادى. مەملەكەتتىك بيۋجەت شىعىستارىن ەلەۋلى تۇردە قايتا قاراۋ جانە بيۋجەتتىك قاعيدانى پايدالانۋدى ۋاقىتشا توقتاتا تۇرۋ قوسىمشا پروينفلياتسيالىق قىسىم تۋدىرۋدا.
جوعارىدا كورسەتىلگەن تاۋەكەلدەردى، ينفلياتسيانىڭ ديناميكاسىن جانە ونىڭ بولجامدارعا سايكەستىگىن ەسكەرە وتىرىپ، اقشا-كرەديت ساياساتى كوميتەتى ءبىرىنشى جارتىجىلدىقتا بازالىق مولشەرلەمەنى قازىرگى دەڭگەيدە ۇستاۋ قاجەتتىگى تۋرالى بۇعان دەيىن دە ايتىلعان پوزيتسياسىن ۇستانادى»، - دەدى ول.
ونىڭ اتاپ وتۋىنشە، بۇل باستالعان ينفلياتسيالىق پروتسەستەردىڭ ءبىرشاما باياۋلاۋىن قولداۋعا، بيۋجەت شىعىستارىنىڭ وسۋىنەن بولاتىن ينفلياتسيالىق قىسىمدى ازايتۋعا جانە ينفلياتسيالىق كۇتۋلەردىڭ جوعارى دەڭگەيدە تۇراقتانۋىنىڭ الدىن الۋعا مۇمكىندىك بەرەدى.
«بازالىق مولشەرلەمە بويىنشا بۇدان كەيىنگى شەشىم جاڭا دەرەكتەردىڭ، سونىڭ ىشىندە ءبىزدىڭ 2023-جىلعى مامىر ايىندا بولجامدى جاڭارتۋ كەزىندەگى ەسكەرەتىن رەفورما پارامەترلەرىنىڭ شىعۋىنا تاۋەلدى بولادى. ءبىز جانار-جاعارماي باعاسىنىڭ وسۋىنەن بولاتىن ينفلياتسياعا تىكەلەي اسەرگە قاتىستى ءىس-شارا قولدانۋدى جوسپارلامايمىز. سونىمەن قاتار، مونەتارلىق ساياسات بويىنشا شەشىم قابىلداۋ كەزىندە ءبىز قوسىمشا اسەرلەردى، سونىڭ ىشىندە بايلانىستى تاۋارلار باعاسىنىڭ وزگەرۋىن، ينفلياتسيالىق كۇتۋلەردى مۇقيات قاداعالاپ، تالدايتىن بولامىز. ايتىلعان ينفلياتسيالىق تاۋەكەلدەردى ەسكەرە وتىرىپ، ۇلتتىق بانك اعىمداعى اقشا-كرەديت جاعدايلارىن ساقتاۋدى جالعاستىرادى»، - دەدى ۇ ب ءتوراعاسى.
