جيگۋلي دايرابايەۆ مانداتىن تاپسىرمايدى - ماجىلىستەگى «اۋىل» فراكسياسى جاۋاپ بەردى

استانا. قازاقپارات - ماجىلىستەگى «اۋىل» پارتياسى فراكسياسى دەپۋتاتى جيگۋلي دايرابايەۆ مانداتىن تاپسىرمايتىنىن مالىمدەدى، دەپ حابارلايدى قازاقپارات ءتىلشىسى.

بۇگىن ماجىلىستە تىلشىلەر «اۋىل» پارتياسى فراكسياسىنىڭ جەتەكشىسى، دەپۋتات اناس باققوجايەۆتان پارتيا مۇشەسى جيگۋلي دايرابايەۆتىڭ ءىستى بولعان ۇلدارىنا قاتىستى سۇراق قويدى.

«اتالعان وقيعادان كەيىن دەپۋتات جيگۋلي دايرابايەۆ مانداتىن تاپسىرا ما؟» دەپ سۇرادى جۋرناليستەر.

ءوز كەزەگىندە اناس باققوجايەۆ فراكسيا مۇشەسى ج. دايرابايەۆ دەپۋتاتتىق مانداتىن تاپسىرمايتىنىن ايتتى.

«ول دەپۋتاتتىق مانداتىن تاپسىرمايدى. وسى ورايدا فراكسيانىڭ مالىمدەمەسىن ايتىپ وتىرمىن. ءبىز وعان ەشقانداي ءمىن تاعا المايمىز. بىرىنشىدەن، ونىڭ جەكە باسىنا قاتىستى اتالعان ىستە ەشتەڭە ايتىلماعان. ەكىنشىدەن، ونىڭ بالالارى ەرەسەك ازاماتتار. ولار ءوز ىسىنە وزدەرى جاۋاپ بەرۋى كەرەك. ولار اۋىل شارۋاشىلىعىمەن ءبىرازدان بەرى اينالىسىپ كەلە جاتىر. تاۋەكەلدىڭ بارىن بىلەدى. وزدەرىن قورعاپ، وزدەرى جاۋاپتى بولۋى كەرەك»، - دەدى ماجىلىستەگى «اۋىل» پارتياسى فراكسياسىنىڭ جەتەكشىسى.

بۇدان بۇرىن حابارلانعانداي، كەشە تاراز قالاسىنىڭ №2 سوتى الاياقتىق جاسادى جانە ءىرى مولشەردە اقشا جىمقىردى دەپ ايىپتاپ، ۇكىم شىعارعان ەكى كۇدىكتىنىڭ ءماجىلىس دەپۋتاتى جيگۋلي دايرابايەۆتىڭ ۇلدارى ەكەنى بەلگىلى بولدى.

جامبىل وبلىستىق اۋىل شارۋاشىلىعى باسقارماسى باسشىسىنىڭ وسىمدىك شارۋاشىلىعى ماسەلەلەرى جونىندەگى ورىنباسارى ەرلان قۇلكەيەۆ، كاسىپكەرلەر ەلجان ەلىباي، ديدار مولداقالىق جانە مارات دايرابايەۆ سۋبسيديا قاعيدالارىن بۇزا وتىرىپ، «البيون» قۇلپىناي كوشەتتەرىنە مەملەكەتتەن سۋبسيديا العان.

ونىڭ ءبىر بولىگى الاياقتىق جولمەن ۇرلانىپ، جەكە قاجەتتىلىگىنە جۇمسالعان. مەملەكەتكە 550849430 تەڭگە كولەمىندە زالال كەلدى.

وسىنىڭ ىشىندە ديدار مولداقالىق پەن مارات دايرابايەۆ - ءماجىلىس دەپۋتاتى جيگۋلي دايرابايەۆتىڭ ۇلدارى.

اۆتور

رۋسلان عابباسوۆ