وزبەكستان اياق- كيىم ءوندىرىسىن قولعا الدى
بۇل - ۇزىن- ىرعاسى 17 ەلدىڭ وكىلى جينالعان كورمە. جۇگى اۋىر جەڭىل ونەركاسىپ سالاسىنا ارنالىپ وتىر. قازاقستاننان الماتىلىق اياق- كيىم فابريكاسى بوي كورسەتتى. كاسىپورىن وتاندىق ءونىمىن شەتەلگە شىعارىپ ءجۇر. ساپاسى جوعارى. رەسەيدەن جىل سايىن تاپسىرىس تۇسەدى.
قايرات دۇيسەنعالي ۇلى، فابريكا ديرەكتورىنىڭ ورىنباسارى:
- كۇنىنە 2500 جۇپ اياق- كيىم شىعارامىز. 500-600 جيىنتىق كيىم تىگىلەدى. مەكەمەدە 700 ادام جۇمىس ىستەيدى. وزبەكستان تاراپىنا كوپ راقمەت. شاقىرىپ، مەكەمەمىزدى ءبىراز جەرگە تانىستىرىپ جاتىرمىز. وزبەكستاندا مۇنداي ءوندىرىس وشاقتارى ءبىرشاما كوپ. جەرگىلىكتى دەڭگەيدە بيزنەسكە كەشەندى قولداۋ كورسەتىلەدى. ءبىر عانا اياق- كيىم تىگۋدەن مەملەكەت جىلىنا 7 تريلليون سوم پايدا كورىپ وتىر.
نارىقتا قىتايلىق وندىرۋشىلەر دە بار. شەتەلدىك ينۆەستور رەتىندە كاسىپ اشىپ، بيزنەسىن ورىستەتكەن.
لي حون، فابريكا ديرەكتورى:
- 2017 -جىلى اشىلدىق. ايەلدەرگە ارنالعان اياق- كيىم شىعارامىز. وزبەكستاندا ازىرلەنگەن برەندىمىز بار. ەل نارىعىنا بەلگىلى. شيكىزاتتىڭ جارتىسى قىتايدان اكەلىنەدى. تاشكەنت وبلىسىندا تولىققاندى فابريكا قۇرىپ، اياققا تۇرعىزىپ الدىق. ەندى شەتەلگە ءونىم جونەلتۋ ءۇشىن جۇمىس ىستەيمىز.
كورمە تۇركيا، رەسەي، يتاليانىڭ بەلگىلى برەندتەرىن ەل نارىعىنا تارتۋدى كوزدەيدى. وزبەكستان شەتەلدىك كومپانيالاردى ىنتالاندىرۋعا دايىن. بيىل ەلدىڭ اياق- كيىم ەكسپورتى 700 ميلليون دوللارعا جەتەدى دەگەن بولجام بار.
ديلوبار زۋفاروۆا «ۋزچارمسانوات» قاۋىمداستىعىنىڭ ەكونوميكالىق جوسپارلاۋ ءبولىمىنىڭ باسشىسى:
- ءبىزدىڭ قاۋىمداستىق 2018 -جىلى كەشەندى جۇمىستاردى قولعا الدى. سالا ءوز الدىنا بولەك قۇرىلىم رەتىندە قاراستىرىلىپ وتىر. پرەزيدەنتىمىز ەرەكشە كوڭىل بولەدى. كوپ ادامعا جۇمىس بەرىلدى. وسىدان 5 جىل بۇرىن تەك 500 ميلليارد سومنىڭ ءونىمى شىعارىلسا، قازىر كورسەتكىش 7,7 تريلليونعا جەتتى. ونىڭ ىشىندە ەكسپورتقا 700 ميلليون دوللاردىڭ ءونىمى جونەلتىلەدى.
الا شاپاندى اعايىن قاراكول قوي شارۋاشىلىعىن دا ساقتاپ قالىپ، تەرىسىن شەتەلگە ەكسپورتتاپ كەلەدى. شيكىزات بازاسى باي. دەمەك كلاستەرلىك شارۋاشىلىق قۇرۋعا مۇمكىندىك مول. وزبەكستاننىڭ جەڭىل ونەركاسىپ قاۋىمداستىعى ەندى وسى ءىستى قولعا الۋدى كوزدەپ وتىر.
www.24.kz
