ارىستانبەك مۇحامەدي ۇلىنا قاتىستى ءىس سوتقا ءتۇستى

استانا. قازاقپارات - ارىستانبەك مۇحامەدي ۇلى مەن وزگە دە تۇلعالارعا قاتىستى ءىس استانا قالاسىنىڭ بايقوڭىر اۋداندىق سوتىنا ءتۇستى، دەپ حابارلايدى قازاقپارات ءتىلشىسى.

«بايقوڭىر اۋداندىق 2№ سوتى بيۋجەت قاراجاتىن تالان-تاراجعا سالۋ ايىبى تاعىلعان ا. مۇحامەدي ۇلى، ا. نۇرازحان، ا. كوشەنوۆ جانە ا. سادۋاقاسوۆانى ايىپتاۋ بويىنشا قىلمىستىق ءىستى وندىرىسكە الدى. اتالعان قىلمىستىق ءىس بويىنشا باستى سوت تالقىلاۋى اشىق سوت وتىرىسىندا 2023-جىلعى 17- ءساۋىر كۇنى ساعات 10:00 گە بەلگىلەنگەن»، - دەلىنگەن استانا قالالىق سوتىنىڭ باسپا ءسوز قىزمەتى تاراتقان اقپاراتتا.

ەستەرىڭىزگە سالا كەتەيىك، 2022-جىلدىڭ 28- مامىرىندا سوت سانكسياسىمەن ۇلتتىق مۋزەي ديرەكتورى ارىستانبەك مۇحامەدي ۇلىنا قاتىستى «كۇزەتپەن ۇستاۋ» بۇلتارتپاۋ شاراسى تاڭدالدى.

تەرگەۋ «التىن ادامنىڭ الەم مۇراجايلارى بويىنشا شەرۋى» حالىقارالىق كورمەسىن وتكىزۋگە، سونداي-اق «قازاقستاننىڭ ۇلتتىق كيەلى نىساندارى مەن مۋزەي قورلارىن جالپى مەملەكەتتىك فوتوگراممەتريالىق 3D- سكانەرلەۋ» جانە «قازاقستان رەسپۋبليكاسىنىڭ ۇلتتىق سيفرلىق كينوكوللەكتسياسىن سيفرلاندىرۋ» جوبالارىنا بولىنگەن بيۋجەت قاراجاتىن ۇرلاۋ فاكتىلەرى بويىنشا جۇرگىزىلدى.

بۇدان باسقا، ا. مۇحامەدي ۇلىنىڭ مادەنيەت جانە سپورت ءمينيسترى لاۋازىمىندا بولعان كەزىندە تۋىستارىنىڭ جانە ۇلەستەس تۇلعالارىنىڭ مەنشىگىنە «سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبى» ر م ق ك، «قازاق ەنتسيكلوپەدياسى» ا ق جانە «قازاق عىلىمي-زەرتتەۋ مادەنيەت ينستيتۋتى» ج ش س زاڭسىز بەرۋگە قاتىستىلىعى تەكسەرىلدى.

تەرگەلگەن قىلمىستىق ىستەر بويىنشا مەملەكەتكە كەلتىرىلگەن زالالدىڭ الدىن الا سوماسى شامامەن 7 ميلليارد تەڭگە دەپ باعالاندى.