ەلىمىزدە ءماسليحاتتاردىڭ وكىلەتتىگى كەڭەيتىلمەك - زاڭ جوباسى
بۇل تۋرالى ماجىلىستە «قازاقستانداعى جەرگىلىكتى ءوزىن-ءوزى باسقارۋ تۋرالى» زاڭ جوباسىن تانىستىرۋ كەزىندە ۇلتتىق ەكونوميكا ۆيتسە-ءمينيسترى باۋىرجان وماربەكوۆ ايتتى، دەپ حابارلايدى قازاقپارات ءتىلشىسى.
«بارلىق دەڭگەيدەگى ءماسليحاتتاردىڭ مارتەبەسىن كوتەرۋ ماقساتىندا قوسىمشا وكىلەتتىكتەر بەرىلەتىن بولادى. بۇل تۇرعىدا اكىمدەردىڭ حالىقپەن كەزدەسۋلەرىندە كوتەرىلگەن پروبلەمالاردى اكىمدىكتەردىڭ شەشۋى بارىسىنا مونيتورينگ جۇرگىزۋ، قوعامدىق ءتارتىپتى قامتاماسىز ەتۋگە قاتىساتىن ازاماتتارعا اقشالاي سىياقى مولشەرىن ايقىنداۋ، دەپۋتاتتاردىڭ اكىمدىكتىڭ بيۋدجەتتىك كوميسسيالارىنىڭ جۇمىسىنا قاتىسۋى، سونداي-اق قاجەت بولعان جاعدايدا بيۋجەتتى ناقتىلاۋعا باستاما جاساۋ قۇقىعىن بەرۋ ەسكەرىلگەن»، - دەدى ب. وماربەكوۆ.
ونىڭ ايتۋىنشا، ءماسليحات ءتوراعاسىنىڭ جانە ءماسليحات اپپاراتى باسشىسىنىڭ اكىمشىلىك ءارى ۇيىمداستىرۋ ماسەلەلەرى بويىنشا وكىلەتتىكتەرى دە قايتا قارالدى.
بۇدان بولەك، تەكسەرۋ كوميسسيالارىنىڭ قىزمەتىن كۇشەيتۋ ەسكەرىلگەن. وسى ورايدا، جوعارى اۋديتورلىق پالاتانى قارجىلاندىرۋ تارتىبىنە ۇقساس تەكسەرۋ كوميسسياسىن قارجىلاندىرۋدىڭ جەكە ءتارتىبى قولدانىلماق.
بۇدان بۇرىن حابارلانعانداي، بۇگىن ماجىلىستە تانىستىرىلعان زاڭ جوباسى اياسىندا قازاقستاندا اۋىلدىق وكرۋگ كەڭەستەرىن قۇرۋ جوسپارلانىپ وتىر.
بۇدان بولەك، اۋىل اكىمى مەن ونىڭ اپپاراتىنا قوسىمشا فۋنكسيالار بەرىلمەك.
سونىمەن قاتار، قازاقستان اۋماعىندا قالالىق ءوزىن-ءوزى باسقارۋ كەڭەستەرى قۇرىلادى. بۇل رەتتە ەلوردا، رەسپۋبليكالىق جانە وبلىستىق ماڭىزى بار قالالار دەڭگەيىندە قاراستىرىلىپ وتىر.
