ەلىمىزدە قالالىق ءوزىن-ءوزى باسقارۋ كەڭەسى قۇرىلادى
«ۇكىمەتتىك ەمەس ۇيىمدار قالالاردا جەرگىلىكتى ءوزىن-ءوزى باسقارۋ دامىماعان دەگەن سىن ايتىپ جاتىر. وسى ورايدا، ەلوردا، رەسپۋبليكالىق جانە وبلىستىق ماڭىزى بار قالالار دەڭگەيىندە جەرگىلىكتى ءوزىن-ءوزى باسقارۋ ورگانى - قالالىق ءوزىن-ءوزى باسقارۋ كەڭەسى قۇرىلادى. ونىڭ وكىلەتتىك مەرزىمى ءتورت جىل بولادى»، - دەدى ب. وماربەكوۆ.
ونىڭ ايتۋىنشا، قالالىق ءوزىن-ءوزى باسقارۋ كەڭەسىن قالىپتاستىرۋ ءۇشىن رەسپۋبليكالىق ماڭىزى بار قالانىڭ، استانانىڭ جانە وبلىستىق ماڭىزى بار قالانىڭ اۋماعى وكرۋگتەرگە، ال وكرۋگتەر ۋچاسكەلەرگە بولىنەدى.
«وكرۋگتەر مەن ۋچاسكەلەردىڭ شەكارالارىن ءتيىستى جەرگىلىكتى ءماسليحات ايقىندايدى. ءار ۋچاسكەدەن ءوزىن-ءوزى ۇسىنۋ جولىمەن وسى ۋچاسكە تۇرعىندارىنىڭ ىشىنەن قالالىق ءوزىن-ءوزى باسقارۋدىڭ وكرۋگتىك كەڭەس قۇرامىنا كىرەتىن جانە ءتيىستى ۋچاسكە تۇرعىندارىنىڭ مۇددەلەرىن بىلدىرەتىن وكىلدەر سايلانادى. قالالىق ءوزىن-ءوزى باسقارۋ كەڭەسىنىڭ قۇرامى وكرۋگ مۇشەلەرىنىڭ قاتارىنان، ءبىر وكرۋگتەن ءبىر وكىل اشىق داۋىس بەرۋ جولىمەن قالالىق ءوزىن-ءوزى باسقارۋدىڭ وكرۋگتىك كەڭەسى مۇشەلەرىنىڭ جالپى سانىنىڭ كوپشىلىك داۋسىمەن قۇرىلادى»، - دەدى ۆيتسە-مينيستر.
قالالىق ءوزىن-ءوزى باسقارۋ كەڭەسى مۇشەلەرىنىڭ قىزمەتى قوعامدىق نەگىزدە جۇزەگە اسىرىلادى.
«ءوز كەزەگىندە، قالالىق ءوزىن-ءوزى باسقارۋ كەڭەسى ءوز قۇزىرەتى اياسىندا حاتتاما تۇرىندە رەسىمدەلەتىن شەشىمدەر قابىلدايدى، جەرگىلىكتى مەملەكەتتىك باسقارۋ ورگاندارىنا جانە ءتيىستى ءماسليحاتقا جولدايدى»، - دەدى ۆەدومستۆو وكىلى.
زاڭ جوباسىندا قالالىق ءوزىن-ءوزى باسقارۋ كەڭەسىنىڭ جانە ونىڭ مۇشەلەرىنىڭ كەلەسى مىندەتتەرى قاراستىرىلعان:
1) جەرگىلىكتى قوعامداستىقتىڭ باسىم مىندەتتەرىن جانە ولاردى ىسكە اسىرۋ مەرزىمدەرىن ايقىنداۋ؛
2) جەرگىلىكتى ماڭىزى بار ماسەلەلەر بويىنشا جەرگىلىكتى وكىلدى جانە اتقارۋشى ورگاندارمەن، مۇلىك يەلەرى بىرلەستىگىنىڭ ءارى كوپپاتەرلى تۇرعىن ۇيلەردىڭ قاراپايىم سەرىكتەستىكتەرىنىڭ وكىلدەرىمەن ءوزارا ءىس-قيمىل جاساۋ؛
3) ازاماتتاردى تۇرعىن ۇيلەر مەن ءۇي ماڭىنداعى اۋماقتاردى كۇتىپ ۇستاۋ، پايدالانىلۋىن، جوندەلۋىن، اباتتاندىرىلۋىن جاقسارتۋ ماسەلەلەرىن شەشۋگە تارتۋ؛
4) جەر كوميسسياسىنىڭ قۇرامىنا قاتىسۋ.
بۇدان بۇرىن حابارلانعانداي، بۇگىن ماجىلىستە تانىستىرىلعان زاڭ جوباسى اياسىندا قازاقستاندا اۋىلدىق وكرۋگ كەڭەستەرىن قۇرۋ جوسپارلانىپ وتىر.
بۇدان بولەك، اۋىل اكىمى مەن ونىڭ اپپاراتىنا قوسىمشا فۋنكتسيالار بەرىلمەك.
