ماۋلەن اشىمبايەۆ يندونەزيا پارلامەنتى پالاتاسىنىڭ ۆيتسە-سپيكەرىمەن كەزدەستى

استانا. قازاقپارات - سەنات سپيكەرى ماۋلەن اشىمبايەۆ يندونەزيا حالىقتىق كونسۋلتاتيۆتىك كونگرەسى وڭىرلەر وكىلدەرى كەڭەسى ءتوراعاسىنىڭ ورىنباسارى نونو سامپونومەن كەزدەستى. كەزدەسۋدە تاراپتار ەكىجاقتى ىنتىماقتاستىقتى جانە پارلامەنتارالىق بايلانىستى ودان ءارى نىعايتۋ ماسەلەلەرىن تالقىلادى.

ءوز سوزىندە ماۋلەن اشىمبايەۆ بيىل قازاقستان مەن يندونەزيا اراسىنداعى ديپلوماتيالىق قاتىناستىڭ ورناعانىنا 30 جىل تولعانىن جانە كەزدەسۋدىڭ وسىنداي مەرەيلى كەزەڭدە ءوتىپ وتىرعانىن اتاپ ءوتتى. سونداي-اق ول ءوزارا ءىس-قيمىلدى پارلامەنتارالىق دەڭگەيمەن بىرگە حالىقارالىق ۇيىمدار اياسىندا دا ارتتىرۋدىڭ ماڭىزدى ەكەنىن ايتتى.

«ءبىز يندونەزيامەن پارلامەنتارالىق ىنتىماقتاستىقتى دامىتۋعا مۇددەلىمىز. وسى رەتتە كونستيتۋتسيالىق رەفورمالار جۇرگىزۋ جانە ولاردى زاڭنامالىق تۇرعىدان قامتاماسىز ەتۋ باعىتىنداعى قازاقستاندىق تاجىريبەنى زەردەلەۋ ءۇشىن يندونەزيالىق دەپۋتاتتار استاناعا ارنايى كەلگەنىن اتاپ وتكەن ءجون. بۇل - پارلامەنتتەرىمىزدىڭ ءوزارا ءتيىمدى ىنتىماقتاستىعىنىڭ جارقىن ۇلگىسى. پارلامەنتارالىق وداق، ازيا پارلامەنتتىك اسسامبلەياسى سياقتى حالىقارالىق ۇيىمدار اياسىندا دا بايلانىسىمىزدى نىعايتۋدىڭ ماڭىزى زور. بۇل ساپار ەلدەرىمىز اراسىنداعى پارلامەنتارالىق ىنتىماقتاستىقتى نىعايتۋعا تىڭ سەرپىن بەرەدى دەپ سەنەمىن»، - دەدى ماۋلەن اشىمبايەۆ.

سونىمەن قاتار سەنات ءتوراعاسى مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان رەفورمالارعا توقتالدى. ودان بولەك، سۇحباتتاسۋشىلار ساۋدا- ەكونوميكالىق، ينۆەستيتسيالىق جانە گۋمانيتارلىق بايلانىستى كەڭەيتۋ ماسەلەلەرىنە نازار اۋداردى. كەزدەسۋ بارىسىندا يندونەزيا استاناسىن نۋسانتارا قالاسىنا كوشىرۋ جانە وسى باعىتتاعى قازاقستاننىڭ وڭ تاجىريبەسى دە اڭگىمەگە ارقاۋ بولدى.

ءوز كەزەگىندە نونو سامپونو كەزدەسۋ ءۇشىن ماۋلەن اشىمبايەۆقا العىسىن ءبىلدىرىپ، يندونەزيا قازاقستانمەن بايلانىستى نىعايتۋعا جانە پارلامەنتارالىق ءوزارا ءىس-قيمىلدى ارتتىرۋعا مۇددەلى ەكەنىن جەتكىزدى.