قازاقستاندا اۋىلدىق وكرۋگ كەڭەستەرى قۇرىلادى - زاڭ جوباسى
بۇل تۋرالى ماجىلىستە قازاقستانداعى جەرگىلىكتى ءوزىن-ءوزى باسقارۋ تۋرالى زاڭ جوباسىن تانىستىرۋ كەزىندە ۇلتتىق ەكونوميكا ۆيتسە-ءمينيسترى باۋىرجان وماربەكوۆ ايتتى، دەپ حابارلايدى قازاقپارات ءتىلشىسى.
«قازىرگى كەزدە قازاقستاندا جەرگىلىكتى ءوزىن-ءوزى باسقارۋدى دامىتۋ بويىنشا ءبىرقاتار ساياسي رەفورما جۇزەگە اسىرىلىپ جاتىر. وسىنداي رەفورمالاردىڭ ءبىرى - جەرگىلىكتى مەملەكەتتىك باسقارۋ مەن جەرگىلىكتى ءوزىن-ءوزى باسقارۋ وكىلەتتىكتەرىنىڭ اراجىگىن اجىراتۋ ماقساتىندا «جەرگىلىكتى ءوزىن-ءوزى باسقارۋ تۋرالى» بولەك زاڭدى ازىرلەۋ. 2022-جىلعى 30- جەلتوقساندا زاڭ جوباسى پارلامەنت ءماجىلىسىنىڭ قاراۋىنا ەنگىزىلدى جانە بۇگىن ءبىز زاڭ جوباسىنىڭ نەگىزگى نوۆەللالارى تۋرالى ايتىپ بەرەمىز. زاڭ جوباسىندا جەرگىلىكتى ءوزىن-ءوزى باسقارۋدىڭ نەگىزگى ورگاندارى، ولاردىڭ مىندەتتەرى مەن وكىلەتتىكتەرى، جەرگىلىكتى ءوزىن-ءوزى باسقارۋدى دامىتۋ بولىگىندەگى مەملەكەتتىك باسقارۋ ورگاندارىنىڭ قۇزىرەتى ايقىندالعان»، - دەدى ب. وماربەكوۆ.
وسى ورايدا ول، اۋىلدىق وكرۋگتەر دەڭگەيىندە ازاماتتاردىڭ اشىق داۋىس بەرۋى ارقىلى ءتورت جىل مەرزىمگە جەرگىلىكتى ءوزىن-ءوزى باسقارۋ ورگانى - كەڭەستى قۇرۋ ۇسىنىلىپ وتىرعانىن ايتتى. كەڭەس قۇرۋ كەزىندە ونىڭ ءوز اپپاراتى بولمايدى، ونىڭ قىزمەتىن اكىم اپپاراتى قامتاماسىز ەتەدى. سونىمەن قاتار، كەڭەس ءتوراعاسى كەڭەس مۇشەلەرىنىڭ اراسىنان اشىق داۋىس بەرۋ ارقىلى سايلانۋى ەسكەرىلگەن. وسى لاۋازىم تۇراقتى نەگىزدە بولادى، سونداي-اق وعان جالاقى اۋىل بيۋجەتى ەسەبىنەن تولەنۋى ۇسىنىلىپ وتىر.
«جەرگىلىكتى ءوزىن-ءوزى باسقارۋ ينستيتۋتىنىڭ تيىمدىلىگىن ارتتىرۋ ءۇشىن جەرگىلىكتى ءوزىن-ءوزى باسقارۋ ورگاندارى مەن اۋىل اكىمدەرىنىڭ دەربەستىگىن كەڭەيتۋ تالاپ ەتىلەدى. بۇل رەتتە كەڭەس كەلەسىدەي فۋنكتسيالارعا يە بولادى. ءبىرىنشى كەزەكتە بۇل - بيۋجەتتى بەكىتۋ جونىندەگى وكىلەتتىكتەر. قازىرگى ۋاقىتتا اۋىل اكىمى بيۋجەت جوباسىن ازىرلەپ، ونى جەرگىلىكتى قوعامداستىق جينالىسىمەن كەلىسىپ، سودان كەيىن اۋدان اكىمدىگىنە قاراۋعا جىبەرەتىنى بەلگىلى. ناتيجەسىندە، بيۋجەتتىڭ IV دەڭگەيىن اۋداندىق ءماسليحات بەكىتەدى. دەمەك، ءبىز بيۋجەتتى بەكىتۋ قۇقىعىن كەڭەس اتىنان تىكەلەي تۇرعىندارعا بەرەمىز. اۋدان ءوز كەزەگىندە اۋىلدارعا بارلىق بولجامدى پارامەترلەردى، ليميتتەر مەن ترانسفەرتتەر كولەمىن جەتكىزەدى»، - دەدى ۆيتسە-مينيستر.
سونىمەن قاتار، كەڭەس وزگە دە قۇجاتتاردى، ونىڭ ىشىندە جەرگىلىكتى قوعامداستىقتى دامىتۋ باعدارلامالارىن، اباتتاندىرۋ ەرەجەلەرىن، اكىم اپپاراتى ازاماتتارعا كورسەتە الاتىن اقىلى قىزمەتتەر تىزبەسىن، سونداي-اق كوشە ساۋداسى، مەرەكەلىك ءىس-شارالار وتكىزۋ ورىندارىن بەكىتەدى.
«وعان قوسا، كەڭەس جەرگىلىكتى ماڭىزى بار جالپى ماسەلەلەر بويىنشا باسقا ەلدى مەكەندەرمەن ىنتىماقتاستىق تۋرالى كەلىسىمدەر جاساسۋ مۇمكىندىگىنە يە بولادى»، - دەدى باۋىرجان وماربەكوۆ.
كەڭەس ءماسليحات الدىندا اكىمدى قىزمەتتەن بوساتۋ تۋرالى ماسەلەگە باستاما جاساۋ قۇقىعىنا يە بولادى. بۇرىن مۇنداي قۇقىق جەرگىلىكتى قوعامداستىق جينالىسىندا بولعان.
