موحاماد ادلي بين ابدۋللا: قازاقستان - مالايزيانىڭ ورتالىق ازياداعى ەڭ ءىرى ساۋدا سەرىكتەسى

استانا. قازاقپارات - قازاقستان مالايزيانىڭ ورتالىق ازياداعى ەڭ ءىرى ساۋدا سەرىكتەسى سانالادى. بۇل تۋرالى بۇگىن اقوردادا مەملەكەت باسشىسى قاسىم-جومارت توقايەۆقا سەنىم گراموتاسىن تاپسىرعاننان كەيىن مالايزيا ەلشىسى موحاماد ادلي بين ابدۋللا ايتتى، دەپ حابارلايدى قازاقپارات ءتىلشىسى.

«وسىناۋ تاماشا ەل - قازاقستاندا مالايزيا كورولىنىڭ اتىنان وكىلدىك ەتۋ مەن ءۇشىن ۇلكەن مارتەبە. قازاقستان مەن مالايزيا 1992-جىلدان بەرى ىنتىماقتاستىقتىڭ بارلىق سالاسىندا جەمىستى قارىم-قاتىناس ورناتىپ وتىر. سول ۋاقىتتان ەكى ەلدىڭ اراسىنداعى ىنتىماقتاستىق تەرەڭدەپ، كەڭەيە ءتۇستى. ساۋدا مەن ينۆەستيتسيا، ونەركاسىپ، يسلامدىق قارجىلاندىرۋ، تۋريزم، مادەنيەت، جوعارى ءبىلىم جانە تەحنيكالىق كومەك كورسەتۋ سالالارىنداعى ىنتىماقتاستىق جولعا قويىلدى. قازاقستان مالايزيانىڭ ورتالىق ازياداعى ەڭ ءىرى ساۋدا سەرىكتەسى سانالادى. قازاقستان مەن مالايزيا اراسىنداعى ىنتىماقتاستىق نىعايا تۇسەدى دەپ سەنىم ارتامىز. ول ءۇشىن الەۋەت جەتكىلىكتى. مالايزيا ۇكىمەتى قازاقستان ۇكىمەتىمەن ىنتىماقتاستىعىن جالعاستىرادى»، - دەدى مالايزيا ەلشىسى.

ەستەرىڭىزگە سالا كەتسەك، قازاقستان پرەزيدەنتىنە سەنىم گراموتالارىن مالايزيا ەلشىسى موحاماد ادلي بين ابدۋللا، ساۋد ارابياسى كورولدىگىنىڭ ەلشىسى فايسال بەن حانيف ءال-كاحتاني، تۇركيا رەسپۋبليكاسىنىڭ ەلشىسى مۋستافا كاپۋدجۋ جانە يران يسلام رەسپۋبليكاسىنىڭ ەلشىسى ءالي اكبار دجوۋكار تاپسىرعان ەدى.