اعىلشىن ازاماتى اناسىنان قالعان شاڭ باسقان ىدىستاردى ساتىپ بايىپ كەتتى

استانا. قازاقپارات - بريتان ازاماتى ۇيىنەن قىتايدىڭ كونە فارفور ىدىستارىن تاۋىپ الىپ، ونى قوماقتى قارجىعا ساتقان.

بۇل تۋرالى The Scottish Sun جازدى.

باسىلىمنىڭ مالىمەتىنشە، انگليانىڭ دەربيشير گرافتىعىندا تۇراتىن 67 جاستاعى ەر ادام ءۇيىن تازالاۋ كەزىندە اناسىنان قالعان شاڭ باسقان ىدىس-اياقتى تاۋىپ العان.

«ول باسىندا قىتاي ىدىس-اياعىن تۋىستارىنا تەگىن تاراتىپ بەرۋدى ويلاعان. ءبىراق از دا بولسا اقشا تابۋ ءۇشىن ىدىستاردى اۋكسيونعا شىعارعان. اعىلشىن ىدىس-اياعى سالىنعان كارتون قوراپ ءۇشىن شامامەن 30 فۋنت ستەرلينگ الامىن دەپ ۇمىتتەنگەن»، - دەيدى دەرەككوز.

67 جاستاعى ەر ازامات ازداپ اقشا تاپقىسى كەلگەنىن ايتادى.

«مەن ول اقشا اكەلە الادى دەپ ويلادىم، ءبىراق بۇل سونشالىقتى كوپ اقشا بولادى دەپ ويلامادىم»، - دەيدى باسىلىمعا بەرگەن سۇقباتىندا.

Hansons اۋكسيونىنا قويىلعان انتيكۆاريات ХVІ عاسىردىڭ اياعىندا قىتاي مين اۋلەتىنىڭ ۆۋتساي ستيلىندەگى فارفور بۇيىمدارى بولىپ شىقتى. مۇنداي ىدىس-اياقتار قىتاي عيباداتحانالارىندا نەمەسە حرامداردا قۇرباندىق كەزىندە قولدانىلعان جانە انگلياعا دۇنيەجۇزىلىك سوعىستاردىڭ بىرىنەن كەيىن كەلگەن بولۋى مۇمكىن.

«كەيىنىرەك حانسونس ماعان قوڭىراۋ شالىپ، قوراپتاعى قىتاي كەراميكاسىنىڭ كەيبىرى قىمبات ەكەنىن ايتتى. ولار ىدىستاردى باسقا باعامەن - 4 مىڭنان 6 مىڭ فۋنتقا دەيىن ساتۋدى جوسپارلادى. مەن بۇل شەشىمگە ريزا ەدىم»، - دەپ ءبولىستى سيرەك كەزدەسەتىن انتيكۆاريات تاۋىپ العان اعىلشىن.

ودان ءارى بولعان وقيعا، ساتۋشىنىڭ ايتۋى بويىنشا، ادام سەنگىسىز بولعان.

«تىكەلەي ونلاين-اۋكتسيوندى كورىپ وتىردىم، باعالار شارىقتاپ كەتتى. مەن كومپيۋتەر قاراپ ايقايلاي بەردىم. اپكەم اۋستراليادان تىكەلەي ەفيردى تاماشالاپ وتىردى، سول كەزدە ءبىز س م س جازىسىپ وتىردىق. نە بولىپ جاتقانىنا سەنە المادىق»، - دەيدى ول.

ءۇش تۇتىنۋشى ءتورت تاعام سالاتىن فارفور جيىنتىعىن الۋ ءۇشىن ءومىر - ءولىم اراسىنداعىداي كۇرەسكەن. اقىرىندا، قىتايلىق قاتىسۋشى تولەگەن جالپى سوما 81900 فۋنت ستەرلينگتى (45 ميلليون تەڭگەدەن استام) قۇراعان.

شاڭ باسقان كارتون قوراپتاعى تاعى ءبىر بۇيىم، سارى مەدالونى بار يمپەريالىق فارفور توستاعان 14500 فۋنت ستەرلينگكە ساتىلدى. قىزعىلت فارفوردان جاسالعان مەدالونى بار قۇمىرا 8800 فۋنت ستەرلينگكە ساتىلعان.

مۇنداي قۇندى قازىنانىڭ قايدان كەلگەنىن ساتۋشى بىلمەيدى.

«مەن تارەلكەلەر مەن ىدىس-اياقتاردىڭ ورتاسىندا ءوستىم. انام ولاردى قابىرعالارعا قويۋدى ۇناتاتىن. ول ىدىس-اياقتاردىڭ قۇندى ەكەنىن بىلمەگەن. انام ولاردى بىرنەشە جىل بۇرىن Rolls-Royce كومپانياسىنىڭ بۇرىنعى ينجەنەرى بولعان جىگىتتەن العان. ىدىستاردى وعان العىس بەلگىسى رەتىندە سىيعا بەرگەن»، - دەيدى ەر ادام.

تابىستى ولجانىڭ يەسى زەرگەرلىك بۇيىمداردى قالاي تاپقانى تۋرالى ءبولىستى.

«مەن انامنىڭ ءۇيىن جيناپ ءجۇرىپ شاڭ باسقان ىدىستاردى تاۋىپ الدىم»، - دەيدى ول.

اعىلشىن ازاماتى ىدىس-اياقتاردى ساتىپ، جالپى 112 مىڭ فۋنت ستەرلينگ (62 ميلليون تەڭگەدەن استام) تابىس تاپقان.

Hansons Auctioneers يەسى چارلز حەنسون اۋكسيونعا ۇسىنعاننان كەيىن ءوزىنىڭ ساۋدا الاڭىندا كارتون قوراپتاعى قىتاي زاتتارىن بايقاعانىن ايتتى.

«مەن بۇل وتە ماڭىزدى جانە قۇندى زاتتار ەكەنىن بىردەن ءتۇسىندىم. ولاردى باعالاۋشى كەڭەسشى جانە كەراميكا جونىندەگى ساراپشى ادام شۋن تەكسەردى. بۇل جەرگىلىكتى ولجا بۇكىل الەمدە قىزىعۋشىلىق تۋدىردى. ۇيىڭىزدەن وسىنداي دۇنيەلەر تابىلىپ تۇرعانى قانداي جاقسى»، - دەپ دەيدى اۋكسيون يەسى.