قارۋ-جاراق يەلەرىنە قانداي تالاپتار قويىلادى

استانا. قازاقپارات - ەلوردا پوليتسياسى قارۋ-جاراق يەلەنگىسى كەلەتىن ازاماتتارعا ونىڭ تالاپتارىن تاعى ءبىر ەسكە سالدى، دەپ حابارلايدى قازاقپارات ءتىلشىسى.

«قارۋ-جاراقتى زاڭدى جولمەن يەلەنگىسى كەلگەن ازامات eGov پورتالى ارقىلى ءوتىنىش بەرەدى. ول 15 جۇمىس كۇنى ىشىندە قارالادى. ءوتىنىش ءتيىستى تالاپتارعا سايكەس كەلسە، قۇزىرلى ورگان ول ازاماتقا قارۋ الۋعا رۇقسات بەرەدى. قارۋ يەلەنگەننەن كەيىن ونى ساقتاۋدىڭ ەرەجەسى بارىن ۇمىتپاعان ءجون. ول ۇيدە نەمەسە كەڭسەدە ارنايى سەيفتە ساقتالۋى ءتيىس جانە دابىل تەتىگى بولۋى مىندەتتى»، - دەدى قالالىق پوليتسيا دەپارتامەنتىنىڭ ەرەكشە تاپسىرمالار بويىنشا اعا ينسپەكتورى، پوليتسيا پودپولكوۆنيگى ازامات امەن بريفينگىدە.

ونىڭ ايتۋىنشا، قارۋ يەسى بەرىلگەن رۇقساتتى ءار 5 جىل سايىن ۇزارتىپ تۇرۋى كەرەك.

«قارۋ-جاراق كامەلەت جاسىنا تولعان ازاماتتارعا عانا بەرىلەدى. ناقتىراق ايتساق، 18 جاستان باستاپ گاز جانە ەلەكتروشوك قارۋ، ال 21 جاستان باستاپ تەگىس ۇڭعىلى قارۋ-جاراقتى ۇستاۋعا رۇقسات»، - دەيدى

پوليتسيا وكىلىنىڭ مالىمەتىنشە، ەلوردادا رەسمي جۇمىس ىستەيتىن 7 قارۋ-جاراق دۇكەنى بار. ولاردىڭ قىزمەتىنە ارنايى تالاپتار قويىلادى.

قارۋ-جاراق دۇكەنى بولەك عيماراتتا ورنالاسۋى ءتيىس. سونىمەن قاتار كۇزەت، دابىل قاعار بەلگىسى جانە بەينەباقىلاۋ كامەراسىمەن قامتىلۋى مىندەتتى.

بۇعان دەيىن قارۋ-جاراق ۇستايتىن استانالىقتاردىڭ كوبەيىپ كەلە جاتقانىن حابارلاعان ەدىك.

ايتا كەتەيىك، ەلوردادا 10- ساۋىردەن باستاپ تىركەلمەگەن قارۋ-جاراقتى قابىلداۋ اكسياسى باستالادى.