قازاقستان بانكتەرى ەسكەرتۋ جاسادى
«سوڭعى ۋاقىتتا قارجى الاياقتىعىنىڭ جاڭا ءتۇرى پايدا بولدى. قاراجاتىڭىزدان ايىرىلىپ قالماس ءۇشىن ساقتاندىرۋ ماقساتىندا سىزدەرگە ەسكەرتەمىز. الاياق قازاقستاندىق نەمەسە شەتەلدىك نومىردەن قوڭىراۋ شالىپ، ءوزىن بانك قىزمەتكەرى رەتىندە تانىستىرادى. ول تەلەفون بايلانىسى قورعالماعانىن ايتىپ، WhatsApp نەمەسە باسقا مەسسەندجەر ارقىلى سويلەسۋدى ۇسىنادى. چاتتا الاياق بانك قىزمەتكەرىنىڭ قولدان جاسالعان كۋالىگىنىڭ فوتوسىن جىبەرەدى. الاياق قاراجاتىڭىزدى بىرەۋلەردىڭ ۇرلاۋعا تىرىسىپ جاتقانىنا سەندىرىپ، ونى «قاۋىپسىز شوتقا» اۋدارۋعا كوندىرەدى. بۇدان كەيىن اقشانى الىپ، ءىز جاسىرادى. ءبىز، قازاقستاندىق بانك قىزمەتكەرلەرى تەلەفون ارقىلى سويلەسۋ كەزىندە قاراجاتتى ەشقاشان باسقا شوتقا اۋدارۋدى ۇسىنبايتىنىن، قۇپياءسوز بەن كود سۇرامايتىنىن رەسمي تۇردە مالىمدەيمىز. قازاقستاندىق بانك قىزمەتكەرلەرى كليەنتتەرىنە ەشقاشان شەتەلدىك نومىردەن قوڭىراۋ شالمايدى» دەلىنگەن مالىمدەمەدە.
جاڭا الاياقتىق سحەماسى قالاي پايدا بولدى؟
ادەتتە الاياقتار شەتەلدە وتىرادى. بۇرىن ارنايى ينتەرنەت- سەرۆيستەردىڭ كومەگىمەن شەتەلدىك نومىرلەرىن قازاقستاندىق ءنومىر سياقتى كورسەتە الاتىن.
الايدا قازاقستاندىق بايلانىس وپەراتورلارى ءنومىردى اۋىستىرىپ كورسەتۋ مۇمكىندىگىنە شەكتەۋ جاسادى.
وسىلايشا، الاياقتارعا وزدەرىن قازاقستاندىقتار سياقتى كورسەتە الۋى قيىنداي ءتۇستى، سوندىقتان ولار شەتەلدىك نومىردەن قوڭىراۋ شالادى.
ولار شەتەلدىك ءنومىردىڭ سەنىم ۇيالاتپايتىنىن تۇسىنەدى، سوندىقتان اۆاتارىندا تانىمال بانكتىڭ لوگوتيپى كورسەتىلگەن، مەسسەندجەردەگى «قورعالعان چاتتا» جالعاستىرۋدى ۇسىنادى.
سونىمەن قاتار قاسكويلەر بۇعان دەيىن بەلگىلى بولعان الاياقتىق تۇرلەرىن دە قولدانۋدى جالعاستىرىپ جاتىر.
مۇنداي كەزدە نە ىستەۋ كەرەك؟ بانكتەر مەن وپەراتورلار مىناداي اقىل- كەڭەس ۇسىنادى:
- سويلەسۋدى بىردەن توقتاتىڭىز (ءوزىڭىز قىزمەتىن تۇتىناتىن بانكتىڭ كولل- ورتالىعىنا قوڭىراۋ شالىپ، كۇدىكتى قوڭىراۋ تۋرالى حابارلاپ، شوتتارىڭىزدىڭ تۇتاستىعىنا كوز جەتكىزۋگە بولادى).
- س م س حابارلاما ارقىلى كەلگەن قۇپيا كود، ينتەرنەت- بانكتەگى جەكە كابينەتىڭىزدەگى قۇپياءسوزدى ەشقاشان، ەشكىمگە ايتپاڭىز.
- قوڭىراۋ شالعانداردىڭ وتىنىشىمەن باسقا شوتتارعا قاراجاتىڭىزدى اۋدارماڭىز
- ولاردىڭ نۇسقاۋىمەن بوگدە موبيلدى قوسىمشالاردى جۇكتەپ الماڭىز!
- تانىس ەمەس ادامدار جىبەرگەن سىلتەمەنى اشپاڭىز.
بۇل قارجىلاي قاۋىپسىزدىكتىڭ قاراپايىم ەرەجەلەرى سىزگە الاياقتاردان ساقتانىپ، قاراجاتىڭىزدان ايىرىلىپ قالماۋعا مۇمكىندىك بەرەدى.
