الەمدە قاتەرلى ىسىك دەندەپ بارادى

استانا. قازاقپارات - قاتەرلى ىسىك - الەمدەگى ەڭ كوپ تارالعان اۋرۋلاردىڭ ءبىرى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، الەمدە ءاربىر التىنشى ءولىم ونكولوگيالىق اۋرۋلارعا بايلانىستى، دەپ حابارلايدى قازاقپارات ءتىلشىسى.

Finprom.kz پورتالىنىڭ مالىمەتىنشە، قاتەرلى ىسىكتىڭ ەڭ كوپ تاراعان تۇرلەرىنە ءسۇت بەزى قاتەرلى ىسىگى، وكپە قاتەرلى ىسىگى، توق ىشەك جانە تىك ىشەك قاتەرلى ىسىگى، قۋىقاستى بەزى قاتەرلى ىسىگى كىرەدى. Our World in Data-نىڭ پاندەمياعا دەيىنگى دەرەگىنشە، 2019 -جىلى قاتەرلى ىسىكتىڭ ءار تۇرىنەن 10,1 ميلليون ادام قايتىس بولدى. بۇل 1990 -جىلمەن سالىستىرعاندا بىردەن 75,1 پايىزعا ارتىق.

كوبىنە قاتەرلى ىسىك سالدارىنان ەڭ كوپ ادام شىعىنى باتىس- تىنىق مۇحيتى ايماعىندا (3,6 ميلليون ادام)، ەۋروپادا (2,3 ميلليون ادام) جانە امەريكادا (1,6 ميلليون ادام) تىركەلدى. وڭتۇستىك- شىعىس ازيادا قاتەرلى ىسىكتەن - 1,5 ميلليون ادام، افريكادا - 533,6 مىڭ ادام، شىعىس جەرورتا تەڭىزى ايماعىندا 477,4 مىڭ ادام قايتىس بولدى.

قاتەرلى ىسىك تۇرلەرىنىڭ ىشىندە 1990 -جىلمەن سالىستىرعاندا انالىق بەز ىسىگىنەن (%85، 10,8 مىڭ جاعدايعا دەيىن) جانە حودجكين ليمفوماسىنان (0,2 پايىز، 27,6 مىڭ جاعدايعا دەيىن) كىسى ءولىمى ازايدى.

قاتەرلى ىسىكتەن كوپ جاعدايدا 70 جاستان اسقان ادامدار (4,9 ملن- ميلليوننان استام ادام) قايتىس بولادى. 50-69 جاس ارالىعىنداعى ناۋقاستاردىڭ 4 ميلليونى، ال 15-49 جاس ارالىعىنداعى 1,1 ميلليون ادام قاتەرلى ىسىكتەن كوز جۇمدى.

بالالار مەن جاسوسپىرىمدەردىڭ ستاتيستيكاسىنا كەلەر بولساق، 5 جاسقا دەيىنگىلەر اراسىندا 44,5 مىڭ بالا، 5-14 جاس ارالىعىنداعى 54,9 مىڭ بالا ونكولوگيالىق اۋرۋلاردان باقيلىق بولعان.

اۆتور

مارلان جيەمباي