وندىرىستەن كەلگەن پەداگوگتەردىڭ جالاقىسىنا ۇستەمەاقى قوسىلادى
سونداي- اق، وقۋ- اعارتۋ مينيسترلىگى ولارعا جالاقىسىنىڭ % 30 مولشەرىندە قوسىمشا اقى تولەنەتىنىن دە مالىمدەدى،
ەڭبەك ءوتىلى 10 جىلدان اساتىن پەداگوگتەرگە جالاقىعا % 35 ۇستەمەاقى تولەنىپ، ساراپشى ساناتى بەرىلەدى. بۇل تۋرالى ق ر وقۋ- اعارتۋ مينيسترلىگىنىڭ تەحنيكالىق جانە كاسىپتىك ءبىلىم دەپارتامەنتىندە ايتىلدى.
«بارلىق قاجەتتى كاسىبي تەحنولوگيالاردى مەڭگەرگەن بىلىكتى مامان دايارلاۋدا نەگىزگى ورىن وقۋ شەبەرلەرى مەن كوللەدجدىڭ ارنايى ءپان پەداگوگتەرىنە تيەسىلى. ويتكەنى ولار ستۋدەنتتەرگە ءبىلىم بەرىپ قانا قويماي، داعدى قالىپتاستىرۋ ءۇشىن ءوزىنىڭ ومىرلىك تاجىريبەلەرىمەن ءبولىسىپ، وندىرىستەگى بىلگەنىن ۇيرەتەدى. سوندىقتان وندىرىستەن تارتىلعان پەداگوگتەر ءۇشىن وسى شارالار قاراستىرىلعان. كوللەدجدەردە العاش رەت پەداگوگيكالىق قىزمەتكە كىرىسكەن جانە كەمىندە 2 جىل وندىرىستىك ءوتىلى بار ماماندار تەستىلەۋدەن وتپەي- اق «پەداگوگ» بىلىكتىلىك ساناتىن الا الادى. سونىمەن قاتار وندىرىستىك وقىتۋ شەبەرلەرى مەن ارنايى ءپان وقىتۋشىلارى اتتەستاتتاۋدان ءوتۋ كەزىندە تەستىلەۋدەن بوساتىلادى، تەك قىزمەت ناتيجەلەرىنىڭ جالپى كەشەندى تەكسەرۋىنەن وتەدى. بۇل وزگەرىستەر كوللەدج پەداگوگتەرىن ىنتالاندىراتىن بولادى جانە كادر دايارلاۋ ساپاسىن ارتتىرادى»، - دەيدى دەپارتامەنت ديرەكتورى ەرنات ءجۇنىسوۆ.
سونداي- اق، زەينەتكەرلىك جاسىنا 4 جىل قالعان پەداگوگتەر، 30 جانە ودان دا كوپ جىل پەداگوگيكالىق ءوتىلى بار پەداگوگتەر بۇرىن بەرىلگەن بىلىكتىلىك ساناتىن راستاعان كەزدە تەستىلەۋدەن بوساتىلاتىن بولادى.
