برازيليادا بالاباقشاعا جاسالعان شابۋىلدان ءتورت ءبۇلدىرشى كوز جۇمدى
شابۋىل كەزىندە بالاباقشادا 40-قا جۋىق ءبۇلدىرشىن بولعان. جارالىلار جەتكىزىلگەن جەرگىلىكتى اۋرۋحانانىڭ مالىمەتىنشە، ولاردىڭ بارلىعى ءۇش جاسقا تولماعان.
پوليتسەيلەردىڭ تاراتقان دەرەككە قاراعاندا، قىلمىسكەر بالاباقشانىڭ قورشاۋىنان سەكىرىپ ءوتىپ، قارۋىمەن كەزدەسكەنىنە سوققى بەرە باستاعان. كەيىن پوليتسيا بولىمشەسىنە ءوزى بارىپ، قاماۋعا الىندى.
برازيليا پرەزيدەنتى لۋيس يناسيۋ لۋلا دا سيلۆا بۇل قىلمىستى جانتۇرشىگەرلىك وقيعا دەپ اتادى.
«وتباسى ءۇشىن بالالارىنان نەمەسە نەمەرەلەرىنەن ايىرىلۋدان ارتىق اۋىرتپالىق جوق، اسىرەسە وسى بەيكۇنا جانە قورعانسىز بالالارعا زورلىق- زومبىلىق جاساۋ ارەكەتى جانىمىزعا قاتتى باتتى. مەن وسى تراگەديا قۇرباندارىنىڭ وتباسىمەن بىرگەمىن، سولار ءۇشىن دۇعا جاسايمىن»، - دەپ جازدى ول Twitter- دە.
بليۋمەناۋ قالاسى ورنالاسقان سانتا- كاتارينا شتاتىنىڭ گۋبەرناتورى جورجينو مەلۋ ورىن العان سۇمدىق قىرعىنعا بايلانىستى ءۇش كۇندىك قارالى كۇن جاريالادى. شتاتتاعى مەكتەپتەر ەرتەڭگە دەيىن بارلىق ساباقتاردى توقتاتتى.
سوڭعى جىلدارى برازيلياداعى مەكتەپتەردە زورلىق- زومبىلىق جاعدايلارى ءجيى تىركەلىپ جاتىر. وتكەن اپتادا سان- پاۋلۋدا 13 جاستاعى وقۋشى مەكتەپتە مۇعالىمدى پىشاقتاپ ولتىرگەن.
وتكەن قاراشادا 16 جاستاعى قارۋلى ازامات اراكرۋستىڭ وڭتۇستىك- شىعىسىنداعى ەسپيريتو- سانتو قالاسىنداعى ەكى مەكتەپكە شابۋىل جاساپ، تورتە ادامدى اتىپ ءولتىرىپ، 10-نان استامىن جارالاعان بولاتىن. 2019 -جىلى بۇرىنعى ەكى ستۋدەنت سان- پاۋلۋ ماڭىنداعى مەكتەپتە سەگىز ادامدى اتىپ ءولتىردى، سودان كەيىن وزدەرىنە قول سالدى.
ەڭ اۋقىمدى قىرعىن 2011 -جىلى بولدى، ول كەزدە ريو- دە- جانەيرو ماڭىنداعى بۇرىنعى باستاۋىش مەكتەپ وقۋشىسى 12 بالانى اتىپ ءولتىرىپ، سودان كەيىن ول دا ءوز- وزىنە قول جۇمسادى.
اۆتور
اسحات رايقۇل
