تاراز قالاسى ەكى اۋماققا بولىنەدى

تاراز. قازاقپارات - تاراز قالاسى الداعى ۋاقىتتا وڭتۇستىك جانە سولتۇستىك اۋماق بولىپ ەكىگە بولىنەدى دەپ جوسپارلانۋدا.

بۇل تۋرالى جامبىل وبلىسىنىڭ اكىمى نۇرجان نۇرجىگىتوۆ تارازدىڭ 11-وكرۋگ تۇرعىندارىمەن كەزدەسۋىندە ايتتى، دەپ حابارلايدى قازاقپارات ءتىلشىسى.

ايتا كەتەيىك، وبلىس اكىمى بۇعان دەيىن دە تاراز قالاسىنىڭ اۋماعىن كەڭەيتىپ، اكىمشىلىك اۋداندارعا ءبولۋ ماسەلەسى بويىنشا كەڭەس وتكىزگەن بولاتىن.

باس جوسپارعا تۇزەتۋلەر ەنگىزىلگەن سوڭ اۋىلدىڭ 44551 حالقى قالا تۇرعىنىنا اينالادى. تاراز حالقىنىڭ سانى 408235 بولىپ، قالا اۋماعى 11755 گەكتارعا ۇلعايادى. سولاي جالپى اۋدانى 30542 گەكتاردى قۇرايدى.

«جوبا جۇزەگە اسقاندا تارازدا سايكەسىنشە، ءبىر قالا اكىمى، ەكى اۋدان اكىمى بولادى. سوندا كونە شاھارداعى الەۋمەتتىك ماسەلەلەردى شەشۋ دە جەڭىلدەي تۇسەدى. ءبىزدىڭ بۇل باستامامىزعا پرەزيدەنت قاسىم- جومارت توقايەۆ قولداۋ ءبىلدىردى»، - دەدى جۇرتشىلىقپەن جۇزدەسۋدە وبلىس اكىمى نۇرجان نۇرجىگىتوۆ.

ايتا كەتەيىك، قالا ماڭىندا ورنالاسقان 11-وكرۋگتىڭ قازىرگى تاڭدا 25 مىڭ تۇرعىنى بار. كەلەر جىلى مۇندا ءۇش بىردەي مەكتەپتىڭ قۇرىلىسىن باستاۋ جوسپارلانىپ وتىر.

تۇرعىندار كەزدەسۋدە: «ەمحانامىز ەسكى، مامان از. سول سەبەپتى بىزگە جاڭا ەمحانا سوعىپ بەرسەڭىز»، - دەگەن ءوتىنىش تە ايتتى. نۇرجان نۇرجىگىتوۆ بۇل ماسەلە الداعى ۋاقىتتا قاراستىرىلاتىنىن جەتكىزدى.

بۇعان دەيىن تاراز قالاسىنىڭ اۋماعىن كەڭەيتىپ، اكىمشىلىك اۋداندارعا ءبولۋ ماسەلەسى قاراستىرىلىپ جاتقانىن جازعان بولاتىنبىز.