عىلىم سالاسىندا مامان جەتىسپەيدى جانە جالاقى دا تومەن: ماسەلە سەناتتا تالقىلاندى
بۇل تۋرالى قازاقپارات پالاتانىڭ باسپا ءسوز قىزمەتىنە سىلتەمە جاساپ حابارلايدى.
كەزدەسۋ عىلىم سالاسىنىڭ جاي-كۇيى، پروبلەمالارى، كەلەشەگى جانە قۇقىقتىق رەتتەۋ ماسەلەلەرىنە ارنالدى.
«بۇگىنگى شارامىزدىڭ نەگىزگى ماقساتى - ەلىمىز پرەزيدەنتىنىڭ وتكەن جىلعى قىركۇيەكتەگى جولداۋىندا بەرىلگەن تاپسىرمالاردىڭ ىسكە اسۋ بارىسى تۋرالى اقپاراتتى جانە VIII سايلانعان پارلامەنتتىڭ ءبىرىنشى سەسسياسىنىڭ اشىلۋىندا سويلەگەن سوزىندەگى قويىلعان تاپسىرمالاردى ورىنداۋ جونىندەگى جوسپارلاردى تىڭداۋ. سونىمەن قاتار، عىلىمدى باسقارۋ جۇيەسىن جاڭعىرتۋ، عىلىمي الەۋەتتىڭ ساپاسىن ارتتىرۋ، عىلىمنىڭ ناتيجەسىن ەكونوميكاعا ەنگىزۋگە قاتىستى ماسەلەلەردى پىسىقتاۋ دا كۇن تارتىبىندە تۇر»، - دەدى نۇرتورە ءجۇسىپ.
سەناتورلار مەن عالىمدار عىلىمي مامانداردىڭ جەتىسپەيتىنى جانە جالاقىسىنىڭ تومەندىگى تۋرالى ماسەلەلەردى كوتەردى. سونداي-اق، قازاقستاننىڭ جاھاندىق يننوۆاتسيالىق رەيتينگىدە ارتتا قالۋى مەن ەلىمىزدەگى يننوۆاتسيالىق ءوندىرىس ۇلەسىنىڭ تومەندىگى دە اتالىپ ءوتتى.
عىلىم جانە جوعارى ءبىلىم مينيسترلىگىنىڭ اقپاراتى بويىنشا، مەملەكەت باسشىسىنىڭ تاپسىرماسىنا سايكەس، عىلىمي جانە ساراپتامالىق قوعامداستىقتىڭ اتسالىسۋىمەن ۇلتتىق دەڭگەيدەگى قولدانبالى ماسەلەلەردى شەشۋگە عىلىمدى تارتۋ ءۇشىن عىلىمدى دامىتۋدىڭ 2025-2026-جىلدارعا ارنالعان باعدارلامالىق قۇجاتتارى ازىرلەنگەن. بۇل قۇجاتتار سالانىڭ كادرلىق الەۋەتىن نىعايتۋعا، عىلىمي قىزمەتكەرلەر سانىن 1,5 ەسەگە كوبەيتۋگە، عىلىمي ەكوجۇيەنىڭ باسەكەگە قابىلەتتىلىگىن ارتتىرۋعا، سونداي-اق قازاقستان رەسپۋبليكاسىنىڭ دامۋ باسىمدىقتارىنا سايكەس سالالاردىڭ نەگىزگى عىلىمي-تەحنيكالىق مىندەتتەردى قالىپتاستىرۋ تەتىكتەرىن ەنگىزۋگە باعىتتالعان.
سەناتورلار وسى شاراعا دايىندىق اياسىندا ءبىرقاتار كوشپەلى كەزدەسۋ وتكىزدى جانە وندا بارلىق مۇددەلى تاراپتاردى تىڭداي وتىرىپ، جەرگىلىكتى جەرلەردەگى وزەكتى ماسەلەلەردى ەگجەي-تەگجەيلى زەردەلەدى. عىلىم قورىنداعى كەزدەسۋ بارىسىندا عىلىم سالاسىن دامىتۋعا زاڭ شىعارۋ ىسىندە قولداۋ كورسەتۋگە، نىعايتۋعا ۇلەس قوسۋعا، ونىڭ ىشىندە سالالىق مينيسترلىكپەن جانە باسقا دا ۇيىمدارمەن ءوزارا ءىس-قيمىل جاساۋعا سەناتورلاردىڭ دايىن ەكەندىگى ايتىلدى.
قاتىسۋشىلار كەزدەسۋ ناتيجەسى بويىنشا وسى باعىتتاعى بىرلەسكەن جۇمىس جالعاساتىنىن اتاپ ءوتتى.
