قازاقستان عالىمدارىنىڭ بيە ءسۇتىن ونكولوگيادا قولدانۋ تۋرالى زەرتتەۋى پاتەنتتەلدى

استانا. قازاقپارات – ق ر پرەزيدەنتى ءىس باسقارماسى مەديتسينالىق ورتالىعى اۋرۋحاناسىنىڭ دارىگەر-عالىمدارى تاتارستاننىڭ قازان ۋنيۆەرسيتەتىمەن بىرلەسىپ، بيە ءسۇتىن ونكولوگيادا قولدانۋعا يننوۆاتسيالىق پاتەنت الدى.

بۇل تۋرالى ق ر پ ءى ب مەديتسينالىق ورتالىعى اۋرۋحاناسىنىڭ باس گاستروەنتەرولوگى باقىتجان بيىمبەتوۆ ءمالىم ەتتى، دەپ حابارلايدى قازاقپارات ءتىلشىسى.

«ءبىز بيە ءسۇتىنىڭ ەمدىك-ديەتالىق، پروفيلاكتيكالىق، وڭالتۋ قاسيەتتەرىن زەرتتەۋمەن اينالىسامىز. تاعى ءبىر باعىت ونكولوگيالىق اۋرۋلارعا قاتىستى. مەنىڭ ونكولوگ-ديسسەرتانت شاكىرتىم ءسۇت بەزى قاتەرلى ىسىگىنىڭ حيميوتەراپياسىندا پاستەرلەنگەن قۇرعاق بيە ءسۇتىن قولدانۋ بويىنشا زەرتتەۋ جۇرگىزىپ جاتىر. بۇل تەراپيا اگرەسسيۆتى جانە كوپتەگەن جاناما اسەرلەردى تۋدىرادى: اۋىر وتەدى، ءومىر ساپاسى تومەندەيدى، انەميا، لەيكوتسيتتەر، ترومبوتسيتتەردىڭ تومەندەۋى، جۇرەكتىڭ اينۋى، قۇسۋ، جايسىزدىق جانە السىزدىك. ءبىز حيميوتەراپيا بويىنشا بيە سۇتىمەن جانە بيە ءسۇتىنسىز عىلىمي زەرتتەۋ جۇرگىزدىك. سالىستىرمالى تۇردە بيە سۇتىمەن جاسالعان زەرتتەۋ جاقسى ناتيجە كورسەتتى»، - دەدى قازاقپارات تىلشىسىنە گاستروەنتەرولوگ باقىتجان بيىمبەتوۆ.

ونىڭ ايتۋىنشا، بيە سۇتىمەن قاتار جۇرگەن حيميوتەراپيانى ناۋقاستار جەڭىلدەۋ قابىلداعان. پاتسيەنتتەردىڭ ءومىر ءسۇرۋ ساپاسى جاقسارىپ، انەميا تۇرىندەگى جاناما اسەرلەر بويىنشا زەرتحانالىق كورسەتكىش وڭالدى. ال، كەيبىر ناۋقاستاردا ءتىپتى انەميا بولماعان دا.

«ەمدەۋدىڭ تيىمدىلىگى بويىنشا ناتيجەلەر ازىرلەنىپ جاتىر. ستاتيستيكالىق وڭدەۋ جۇرگىزىلەدى. ازىرگە حيميوتەراپيانىڭ تيىمدىلىگى قاي توپتا جاقسى، قاي توپتا ناشار ەكەنىن تولىق ايتا المايمىز. دەگەنمەن، بيە ءسۇتىن ۇنتاق تۇرىندە قولدانۋ ارقىلى حيميوتەراپيا وڭ ناتيجە بەردى. ونى مولشەرلەۋ دە وتە ىڭعايلى. ناتيجەگە تاتارستان عالىمدارىمەن بىرگە قول جەتكىزىپ، پاتەنتتەدىك. بۇل - بىرلەسكەن ەڭبەك»، - دەدى ب. بيىمبەتوۆ.

ستاتيستيكالىق زەرتتەۋلەر اياقتالعاننان كەيىن وسى تاقىرىپتا ديسسەرتاتسيا قورعالادى. بۇگىنگە دەيىن بۇل تاقىرىپتا 9 ماقالا جاريالاندى، سوڭعىسى - حيميوتەراپيادا بيە ءسۇتىن قولدانۋ بويىنشا عالىمداردىڭ زەرتتەۋى.

سونداي-اق، ق ر پ ءى ب مەديتسينالىق ورتالىعى اۋرۋحاناسىنىڭ باس گاستروەنتەرولوگى باقىتجان بيىمبەتوۆ وسى باعىتتاعى جۇمىستى جالعاستىراتىنىن ايتتى.

«بىزگە عىلىمي ىزدەنىس جاساعىسى كەلەتىن، كوزدەرى جانىپ تۇرعان جاس ماماندار كەرەك. ءبىز زەرتتەۋشىلەرگە مۇقتاجبىز»، - دەيدى ول.