رينات زايىتوۆ مادەنيەت قىزمەتكەرلەرىنىڭ جالاقىسىن كوتەرۋدى سۇرادى

استانا. قازاقپارات - ءماجىلىستىڭ جالپى وتىرىسىندا ۇكىمەت باسشىسىنىڭ ورىنباسارى التاي كولگىنوۆتىڭ اتىنا دەپۋتاتتىق ساۋال جولداعان رينات زايىتوۆ مادەنيەت سالاسى قىزمەتكەرلەرىنىڭ مۇڭىن كوتەردى، دەپ حابارلايدى قازاقپارات ءتىلشىسى.

«بىرىنشىدەن، مەنىڭ سىزگە جولداپ وتىرعان ساۋالىمنىڭ ارتىندا قازاقستاننىڭ ونداعان مىڭ مادەنيەت سالاسى قىزمەتكەرى تۇر. ەكىنشىدەن، بۇل - «AMANAT» پارتياسىنىڭ سايلاۋالدى باعدارلاماسىنا ەنىپ، حالىققا بەرگەن ۋادەسى. مەملەكەتىمىزدىڭ يدەولوگياسىن دۇرىس جۇرگىزۋدە جانە وتانىمىزدى الىس-جاقىن شەتەلدەرگە تانىستىرۋدا مادەنيەتتىڭ اتقارىپ جاتقان جۇمىسى از ەمەس. رەسپۋبليكامىز بويىنشا ەلەۋلى ەڭبەك ەتىپ جاتقان 56 تەاتر، 20 فيلارمونيا، 267 مۇراجاي، 3891 كىتاپحانا بار. ول از دەسەڭىز، قازاقستان بويىنشا قانشاما مادەنيەت ۇيلەرى جانە تاعى سول سياقتى بىرنەشە ونەر ۇجىمدارى دا بار. ع. مۇسىرەپوۆتىڭ «ادام ونەردى قانشالىقتى جاقسى كورسە، سونشالىقتى قورعاۋعا مىندەتتى» دەگەن ناسيحات ءسوزى بار. وكىنىشكە قاراي، ءبىز بۇگىنگى كۇندە مەملەكەتتىڭ ايناسى بولىپ وتىرعان مادەنيەت قىزمەتكەرلەرىن مۇلدەم ەسكەرۋسىز قالدىردىق»، - دەدى ءماجىلىس دەپۋتاتى.

ونىڭ اتاپ وتۋىنشە، مادەنيەت سالاسىنىڭ قىزمەتكەرلەرى دەگەنىمىز - تەك قانا ساحنادا ونەر كورسەتەتىن تۇلعالار ەمەس، سولاردىڭ جاعدايىن جاساپ وتىرعان ساحنا سىرتىنداعى ەڭبەك ادامدارى.

«ولار مەملەكەتىنە شىنايى ماحابباتپەن قاراپ، مادەنيەتكە بار ىقىلاسىمەن قىزمەت ەتەتىن: ساحنا تەحنيكتەرى، كوستيۋمەرلەر، گريمەرلەر، جارىق تۇسىرۋشىلەر، دىبىستاۋشى دەگەن سياقتى مىڭداعان ادامدار. جانعا باتاتىن ءبىر جايت، بۇل اتالعان قىزمەتكەرلەر ءالى كۇنگە دەيىن ساناتى جوعارىلاپ، جالاقىسى ءوسىپ جاتقان ۇستازدار، دارىگەرلەر سياقتى ماماندار قاتارىنان دا ورىن العان جوق. قازىرگى تاڭدا قاي مەكەمەنى الساڭىز دا، مادەنيەت سالاسى قىزمەتكەرلەرىنىڭ جالاقىسى 60 مىڭ تەڭگەدەن باستالىپ، 100 مىڭ تەڭگەگە جەتەر-جەتپەس مەجەدەن اسا الماي تۇر. ەڭبەكاقىنىڭ تومەندىگى بىلىكتى مامانداردىڭ جۇمىستان ءوز ەركىمەن كەتىپ، مادەنيەت وشاقتارىنىڭ جۇمىسىن تۇرالاتۋعا اكەلىپ سوعادى. قۇرمەتتى التاي سەيدىر ۇلى، وسى ورايدا، مەن قازاقستان رەسپۋبليكاسى ۇكىمەتىنىڭ «ازاماتتىق قىزمەتشىلەرگە، مەملەكەتتىك بيۋجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە، قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» 2015-جىلعى 31- جەلتوقسانداعى 1193№ قاۋلىسىنىڭ قوسىمشاسىنا مادەنيەت، ارحيۆ جانە كىتاپحانا قىزمەتكەرلەرىنىڭ كوەفيتسەنتتەرىن وزگەرتىپ، جالاقىسىن ءوسىرۋىڭىزدى سۇرايمىن»، - دەدى رينات زايىتوۆ.