يۋري يلين «قازاۆياقۇتقارۋ» ۇشقىشتارىنىڭ جۇمىستان كەتۋگە جاپپاي ءوتىنىش بەرۋىنە پىكىر ءبىلدىردى

استانا. قازاقپارات - توتەنشە جاعدايلار ءمينيسترى يۋري يلين «قازاۆياقۇتقارۋ» ۇشقىشتارىنىڭ جۇمىستان كەتۋگە جاپپاي ءوتىنىش بەرۋىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرگەن ول قازىرگى ۋاقىتتا بارلىق 23 ءوتىنىش بويىنشا قىزمەتتىك تەكسەرۋ جۇرگىزىلىپ جاتقانىن اتاپ ءوتتى.

«تالاپ پەن نارازىلىق جالاقىعا دا بايلانىستى بولدى. ءبىراق قازىرگى ۇشقىشتار قۇرامى، ونىڭ ىشىندە اتالعان ۇشقىشتار دا جالاقى الىپ وتىردى جانە ۇشۋلار جۇزەگە اسىرعانى ءۇشىن قوماقتى اقشالاي قاراجات الدى. ۇشقىشتاردىڭ ءبىر جىل ىشىندەگى تابىسى 20 ميلليون تەڭگەدەن اسىپ تۇسەدى. مەنىڭشە، ازاماتتىق اۆياتسيادا، ونىڭ ىشىندە قورعانىس مينيسترلىگىنىڭ قۇرىلىمدىق بولىمشەلەرىندە مۇنداي جالاقىمەن كەز كەلگەنى ماقاتانا المايدى»، - دەدى مينيستر.

ول ۇشقىشتاردىڭ جۇمىس جاعدايىنا قاتىستى شاعىمدارىنا دا توقتالدى.

«بارلىق ۋاقىتتا قۇرامنىڭ تۇراتىن جانە ورنالاسقان جەرى بەسجۇلدىزدى قوناق ءۇي تالاپتارىنا ساي بولۋى ءتيىس ەمەس. ءار جاعدايدى جەكە قاراستىرامىز. كوپتەگەن ۇشقىش وزدەرىن «قۇداي جانە پاتشا» سانايدى. ۇشقىش ۇشىپ كەلە جاتقاندا عانا «قۇداي جانە پاتشا». ول اۋە كەمەسىنىڭ بورتىندا وزىمەن بىرگە قانداي لاۋازىمدى تۇلعا ۇشىپ كەلە جاتسا دا شەشىم قابىلداۋعا قۇقىلى. بورتتىڭ تەحنيكالىق جاي- كۇيىنە نەمەسە اۋا رايى جاعدايىنا بايلانىستى ۇشۋدى نە ۇشپاۋدى ءوزى شەشەدى. ال جەردە ول ت ج م قىزمەتكەرى جانە ءوزىنىڭ قىزمەتتىڭ مىندەتىن ورىنداۋى ءتيىس»، - دەدى يۋري يلين.

ونىڭ اتاپ وتۋىنشە، تەكسەرۋ قورىتىندىسىندا شەشىم قابىلداناتىن بولادى. ال ازىرشە ۇشقىشتاردىڭ ەشقايسى جۇمىستان شىققان جوق.

اۆتور

مارلان جيەمباي