ەرلان قوشانوۆ: وزەكتى ماسەلە بويىنشا جۋرناليستەرگە سۇحبات بەرۋ - دەپۋتاتتىڭ باستى مىندەتتەرىنىڭ ءبىرى

استانا. قازاقپارات - وزەكتى ماسەلەلەر بويىنشا پىكىر ءبىلدىرۋ - دەپۋتاتتاردىڭ باستى مىندەتتەرىنىڭ ءبىرى. بۇل تۋرالى ءماجىلىستىڭ جالپى وتىرىسىندا پالاتا ءتوراعاسى ەرلان قوشانوۆ ايتتى، دەپ حابارلايدى قازاقپارات ءتىلشىسى.

«اشىقتىق ۇستانىمى ءماجىلىس جۇمىسىنداعى نەگىزگى باسىمدىق بولىپ قالا بەرەدى. ءبىز وسى باعىتتان اينىمايمىز. بۇگىنگى جالپى وتىرىستىڭ ءوزى رەسپۋبليكالىق تەلەارنالاردان تىكەلەي ەفيردە كورسەتىلىپ وتىر. پرەزيدەنت تە بۇل تاجىريبەنىڭ تيىمدىلىگى تۋرالى باسا ايتقانىن بىلەسىزدەر. ماجىلىسكە اشىق ءارى جاريا تۇردە قىزمەت ەتۋگە بارلىق جاعداي جاسالعان. جۋرناليستەرگە سۇحبات بەرىپ، وزەكتى ماسەلەلەر بويىنشا پىكىر ءبىلدىرىپ وتىرۋ - دەپۋتاتتاردىڭ باستى مىندەتتەرىنىڭ ءبىرى»، - دەدى ءماجىلىس ءتوراعاسى.

مۇنان بولەك، ول زاڭداردى تالقىلاۋعا قوعام وكىلدەرى مەن تاۋەلسىز ساراپشىلاردى شاقىرۋ دا وتە ماڭىزدى ەكەنىن اتاپ ءوتتى.

«اسىرەسە، ءماسليحات پەن قوعامدىق كەڭەستەر ارقىلى ماجىلىستە وڭىرلەردىڭ دە ءۇنى ەستىلىپ جاتۋى ءتيىس. سونىمەن بىرگە قوعامدىق پالاتا دا كوپ ۇزاماي جۇمىسىن باستايدى. ول قىزۋ پىكىرتالاس الاڭىنا اينالاتىنى ءسوزسىز. ەل بولاشاعىنا بەيجاي قارامايتىن بارلىق ازاماتقا، قوعامدىق ۇيىمدارعا ءبىزدىڭ ەسىگىمىز ايقارا اشىق. ناعىز حالىقتىق پارلامەنت دەگەنىمىز، مەنىڭ ويىمشا وسى. وسىنىڭ ءبارى ەلىمىزدە پارلامەنتتە جاڭا ساياسي ءداستۇر، جاڭا ساياسي مادەنيەت قالىپتاسقانىن كورسەتەدى. الدا اۋقىمدى جۇمىس كۇتىپ تۇر»، - دەدى ەرلان قوشانوۆ.

اۆتور

مارلان جيەمباي