قازاقستان الەمدەگى ەڭ ءىرى مۇناي جەتكىزۋشى ەلدەردىڭ قاتارىنا كىرۋى مۇمكىن

استانا. قازاقپارات - قازاقستان الەمدەگى ەڭ ءىرى مۇناي جەتكىزۋشى ەلدەردىڭ قاتارىنا كىرۋى مۇمكىن. بۇل تۋرالى پرەزيدەنت قاسىم- جومارت توقايەۆ ايتتى، دەپ حابارلايدى قازاقپارات.

بۇعان دەيىن حابارلاعانىمىزداي، بۇگىن مەملەكەت باسشىسى «تەڭىزشيەۆرويل» كومپانياسىنىڭ 30 جىلدىعىنا ارنالعان سالتاناتتى جيىنعا قاتىستى.

ق. توقايەۆتىڭ ايتۋىنشا، كومپانيا مۇناي سالاسىندا وزىق تەحنولوگيالاردى بەلسەندى تۇردە قولدانىپ، كومىرسۋتەگى بەيتاراپتىعىنا قول جەتكىزۋگە سەپتىگىن تيگىزەتىن شارالاردى دايەكتى تۇردە قابىلداپ جاتىر.

«2000-جىلدان بەرى كومپانيا اۋاعا تارالاتىن شىعارىندىلاردىڭ كولەمىن 75 پايىزعا ازايتتى. بۇل باعىتتاعى جۇمىس جالعاسۋعا ءتيىس. تەڭىز كەن ورنىنداعى ءوندىرىستى اۋقىمدى تۇردە كەڭەيتۋ جوبالارىنىڭ جۇزەگە اسىرىلۋى اياقتالىپ كەلەدى. بۇل ەلىمىزگە مۇناي ءوندىرىسىنىڭ كولەمىن تاعى دا 12 ميلليون تونناعا ارتتىرىپ، الەمدەگى ەڭ ءىرى مۇناي جەتكىزۋشى ەلدەردىڭ قاتارىنا كىرۋگە مۇمكىندىك بەرەدى»، - دەدى پرەزيدەنت.