الماتىدا جولاۋشىلار اۆتوبۋسى وتقا وراندى

الماتى. قازاقپارات - الماتىدا وتكەن تۇندە «جەتىسۋ» بازارى اۋماعىندا جولاۋشىلار اۆتوبۋسى ورتەندى، دەپ حابارلايدى قازاقپارات ءتىلشىسى.

ۆيدەو الەۋمەتتىك جەلىدە تارادى.

الماتى قالالىق توتەنشە جاعدايلار دەپارتامەنتىنىڭ مالىمەتىنشە، 3- ساۋىردە تۇنگى ساعات 23:10 دا تۇركسىب اۋدانى، «قايرات» شاعىن اۋدانى، 181/2 مەكەنجايىنداعى ءۇيدىڭ ماڭىندا 125-باعىتتا قاتىنايتىن «لياز-529265» ماركالى اۆتوبۋس ورتەندى.

«ءورت سوندىرۋشىلەردىڭ العاشقى بولىمشەلەرى ساعات 23:16 دا جەتتى. جالىندى سوندىرۋگە جانە اۆتوبۋس كونسترۋكتسياسىن سالقىنداتۋ ءۇشىن دەرەۋ كوبىگى بار وقپاندار بەرىلدى. قابىلدانعان شارالاردىڭ ارقاسىندا ءورتتىڭ تاراۋى ساعات 23:19 دا توقتاتىلىپ، ساعات 23:22 دە تولىق اۋىزدىقتالدى. وقيعا سەبەبى انىقتالۋدا»، - دەپ حابارلادى ت ج د باسپا ءسوز قىزمەتىنەن.

قالالىق ت ج د كولىك قۇرالدارى تەز ورتەنەتىنىن، نەبارى 2-3 مينۋت ىشىندە ونى تولىق جويىپ جىبەرەتىنىن ەسكە سالادى. سول سەبەپتى كولىكتە ءورتتىڭ العاشقى بەلگىلەرى پايدا بولعان كەزدە جولاۋشىلار ەسىكتەردەن نەمەسە قوسالقى شىعاتىن جەرلەردەن دەرەۋ شىعىپ كەتۋى قاجەت.

ەسكە سالساق، اقپان ايىندا الماتىنىڭ مەدەۋ اۋدانىندا دا جولاۋشىلار اۆتوبۋسى ورتەنگەن بولاتىن.