قازاقستانعا ۆيزاسىز كەلە الاتىن ەلدەر سانى ارتادى

استانا. قازاقپارات - مادەنيەت جانە سپورت ءمينيسترى اسحات ورالوۆ ىشكى تۋريزمدى دامىتۋ باعىتىنداعى شارالارعا توقتالىپ ءوتتى، دەپ حابارلايدى قازاقپارات ءتىلشىسى.

«مەملەكەت باسشىسى تۋريزمدى دامىتۋ ماسەلەلەرىن ايرىقشا اتاپ ءوتتى. كۋرورتتى ايماقتاردىڭ ينفراقۇرىلىمىن ارتتىرۋ ماقساتىندا اۆتوموبيل جولدارىن سالۋ جۇمىسى جۇرگىزىلەدى. سونىمەن قاتار كۋرورتتى ايماقتاردى موبيلدى بايلانىسپەن %100 قامتۋ قولعا الىنادى. ارينە، اتالعان جۇمىستاردى ىسكە اسىرۋعا قوسىمشا قارجى قاجەت. وسى ورايدا ەلدى مەكەندەردەن تىس جەرلەردەگى جانە ۇلتتىق پاركتەر اۋماعىنداعى تۋريستىك نىساندار ينفراقۇرىلىمىن دامىتۋدى جەرگىلىكتى اكىمدىكتەر قۇزىرەتىنە بەرۋ قاجەت. تۋريستىك سەرۆيس ساپاسىن جاقسارتۋ جانە سالا ماماندارىن دايارلاۋ دا ماڭىزعا يە»، - دەدى اسحات ورالوۆ ۇكىمەت وتىرىسىندا.

ونىڭ ايتۋىنشا، وتاندىق تۋريزم سالاسىن سيفرلاندىرۋ باعىتىنداعى جۇمىس جالعاسادى.

«قوناق ۇيلەردى «EQonaq» جۇيەسىمەن 100 پايىز قامتىپ، گيدتەردىڭ قىزمەتىن سيفرلاندىرۋ جانە «Kazakhstan.travel» پورتالىن جاڭعىرتۋدى اياقتايمىز. بۇدان بولەك، شەتەلدىك تۋريستەر ءۇشىن قولايلى كليمات جاسالادى. ۆيزاسىز ەلدەردىڭ ءتىزىمىن 100 گە دەيىن ارتتىرۋ (2022-جىلى - 79 ەل) ماسەلەسى جانە جاڭادان تىكەلەي اۋە رەيستەرىن اشۋ جاعى پىسىقتالىپ جاتىر»، - دەيدى مينيستر.

ايتا كەتەيىك، وسىعان دەيىن ا. ورالوۆ 2030-جىلعا قاراي وتاندىق فيلمدەر پروكاتى 35 پايىز ارتاتىندىعىن جەتكىزدى.