بانكتەرگە سالىق جەڭىلدىكتەرى تىم كوپ بەرىلەدى - جوعارى اۋديتورلىق پالاتا

استانا. قازاقپارات - مەملەكەتتەن بەرىلەتىن سالىق جەڭىلدىكتەرىنىڭ ەڭ كوپ ۇلەسى قارجى سەكتورىنا تيەسىلى.

جوعارى اۋديتورلىق پالاتاسىنىڭ 2022-جىلعى جۇمىسى تۋرالى اقپاراتتا وسىنداي دەرەك بەرىلگەن، دەپ حابارلايدى قازاقپارات ءتىلشىسى.

«سالىقتىق جەڭىلدىكتەردى بەرۋدە تەڭگەرىمسىزدىك بار. ەكونوميكانىڭ ناقتى سەكتورىن دامىتۋعا باسىمدىق بەرىلىپ وتىرعانىنا قاراماستان، جەڭىلدىكتەردىڭ ەڭ كوپ ۇلەسى قارجى سەكتورىنا تيەسىلى»، - دەلىنگەن پالاتانىڭ 2022-جىلعى جۇمىستارى تۋرالى اقپاراتىندا.

پالاتا كەلتىرگەن مىسالعا سۇيەنسەك، 2021-جىلى سالىق جەڭىلدىكتەرىنىڭ 27 پايىزى قارجى سەكتورىنا، 20,3 پايىزى تاۋ-كەن وندىرىسىنە، 14,5 پايىزى وڭدەۋ سالاسىنا بەرىلگەن.

«بۇل رەتتە قازاقستاندا قارجى سەكتورىنىڭ سالىق جۇكتەمەسىنىڭ دەڭگەيى وتە تومەن. سونىمەن قاتار 2010-2020-جىلدار ارالىعىندا بانكتەرگە 6,5 تريلليون تەڭگە سوماعا مەملەكەتتىك قولداۋ كورسەتىلگەنىن ايتا كەتكەن ءجون. 5 جىل ىشىندە قازاقستاندىق بانكتەردىڭ تابىسى 3,5 ەسەدەن استام ءوسىپ، 2022-جىلدىڭ قورىتىندىسى بويىنشا 1,5 تريلليون تەڭگەنى قۇرادى. ولاردىڭ كىرىستىلىگى الەمدەگى ەڭ جوعارى (30,3 پايىز)، ال شىعىنداردىڭ كىرىستەرگە اراقاتىناسى ەڭ تومەن (29,9 پايىز) بولىپ تابىلادى»، - دەپ جازادى پالاتا ساراپشىلارى.