دارىگەر قاتەلىگى ءۇشىن جازا جەڭىلدەتىلۋى مۇمكىن - زاڭ جوباسى

استانا. قازاقپارات - كاسىبي مىندەتىن ءتيىستى دەڭگەيدە اتقارماعان دەنساۋلىق ساقتاۋ قىزمەتكەرلەرىنە تاعايىندالاتىن جازانى جەڭىلدەتۋ قاراستىرىلىپ جاتىر.

بۇل تۋرالى دەنساۋلىق ساقتاۋ ءمينيسترى اجار عينيات ءمالىم ەتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسى بويىنشا ءبىزدىڭ مينيسترلىك «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەدى. زاڭ جوباسىندا مەديتسينالىق جانە فارماتسيەۆتيكالىق قىزمەتكەرلەردىڭ كاسىبي مىندەتتەرىن تيىسىنشە ورىنداماعانى ءۇشىن قىلمىستىق قۇقىق بۇزۋشىلىقتاردى ىزگىلەندىرۋ جانە ق ر قىلمىستىق كودەكسىنىڭ 317-بابىنىڭ سانكسيالىق شارالارىن تومەندەتۋ جونىندەگى نورمالار ۇسىنىلدى»، - دەدى اجار عينيات ۇكىمەت وتىرىسىندا بايانداما جاساي وتىرىپ.

سونداي-اق مينيستر اتالعان وزگەرىستى ەنگىزۋدىڭ سەبەبىن ءتۇسىندىرىپ ءوتتى.

«مەديتسينا قىزمەتكەرلەرىنىڭ كاسىبي جاۋاپكەرشىلىگىنە قاتىستى ۇسىنىلعان مودەل جانە ولار مىندەتىن ءتيىستى اتقارماعان جاعدايدا جازانى جەڭىلدەتۋ الدىمەن ازاماتتاردىڭ قۇقىعىن قورعاۋعا باعىتتالادى. مەديتسينالىق قىزمەتتەردى الۋ كەزىندە دەنساۋلىققا كەلتىرىلگەن زياندى وتەۋ، سول سياقتى مەديتسينا قىزمەتكەرلەرىنىڭ جەكە جانە قارجىلىق قۇقىعىن قورعاۋدىڭ مۇمكىندىگى ارتادى. ودان بولەك، مەديتسينا سالاسىنان بىلىكتى مامانداردىڭ كەتۋىن ازايتۋعا باعىتتالىپ وتىر»، - دەيدى ۆەدومستۆو باسشىسى.