ءبىلىم سالاسىندا مامانداردى دايارلاۋدا قانداي وزگەرىستەر بولادى

استانا. قازاقپارات - اتتەستاۋ كەزىندە پەداگوگتەر جينايتىن قۇجاتتار ازايادى. بۇل تۋرالى ۇكىمەت وتىرىسىندا پرەزيدەنتتىڭ ق ر پارلامەنتى سەسسياسىنىڭ اشىلۋىندا بەرگەن تاپسىرمالارىن ىسكە اسىرۋ بارىسىن تالقىلاۋ كەزىندە ق ر وقۋ-اعارتۋ ءمينيسترىنىڭ مىندەتىن اتقارۋشى عاني بەيسەمبايەۆ ايتتى، دەپ حابارلايدى قازاقپارات ءتىلشىسى.

«وقۋ-اعارتۋ مينيسترلىگى پرەزيدەنت تاپسىرمالارىن ۋاقتىلى جانە ساپالى ورىنداۋ ماقساتىندا وڭىرلىك ءبىلىم باسقارمالارى باسشىلارى مەن پەداگوگيكالىق جوعارى وقۋ ورىندارى رەكتورلارىنىڭ قاتىسۋىمەن شۇعىل تۇردە كەڭەس وتكىزىپ، وسى باعىتتارداعى جۇمىستاردى جۇيەلى ىسكە اسىرۋ ماقساتىندا، عىلىم جانە جوعارى ءبىلىم مينيسترلىگىمەن بىرلەسكەن ۆەدومستۆوارالىق ۇيلەستىرۋ كەڭەسىن قۇردى. ماسەلەلەردى ءجىتى زەرتتەپ ساپالى شەشۋ ماقساتىندا مينيسترلىك جانىنان ءبىلىم سالاسىنىڭ ساراپشىلارىنان جاساقتالعان جۇمىس توبى دا قۇرىلدى»، - دەدى ع. بەيسەمبايەۆ.

وسى ورايدا ول مۇعالىمدەردىڭ دەڭگەيىن انىقتاۋ اتتەستاتتاۋ ارقىلى جۇزەگە اسىرىلاتىنىن ەسكە سالدى. قازىرگى قولدانىستاعى ەرەجەلەرگە ساي اتتەستاتتاۋ ءراسىمى 3 كەزەڭنەن تۇرادى - دارەجەنى باعالاۋ، قىزمەت ناتيجەلەرىن كەشەندى تالداۋ، ءبىلىمدى باعالاۋ.

«اتتەستاۋداعى نەگىزگى پروبلەمالار - بۇل پەداگوگتەردىڭ ەلەكتروندىق جانە قاعاز نۇسقادا جينايتىن قۇجاتتارىنىڭ كوپتىگى، اتتەستاتتاۋ كوميسسياسىنىڭ ۇسىنىلعان قۇجاتتاردى ۇزاق قاراۋى، تەست تاپسىرمالارىنىڭ ساپاسى. سونىمەن قاتار، باستى ماسەلەلەردىڭ ءبىرى - اتتەستاتتاۋ پروتسەسىنىڭ وبەكتيۆتىلىگىن، اشىقتىعىن جانە اكادەميالىق ادالدىق پرينتسيپتەرىنىڭ ساقتالۋىن قامتاماسىز ەتۋ. وسى ماسەلەردى رەتتەۋدىڭ باستى قۇرالى رەتىندە اتتەستاتتاۋ پروتسەسىن اۆتوماتتاندىرۋ قولعا الىندى. قاراپايىم تىلمەن ايتقاندا، اتتەستاتسيا جۇيەسى «ءبىر باتىرما» پرينتسيپىمەن جۇرگىزىلەتىن بولادى. ياعني، ءمۇعالىم تەك اتتەستاتسيادان وتۋگە نيەت بىلدىرگەنىن راستايدى، ال اتتەستاتسيادان ءوتۋشىنىڭ جەكە قۇجاتتارى جانە ونىڭ دەڭگەيىن انىقتايتىن ءتيىستى ماتەريالداردى اقپارتتىق جۇيە ءوزى اۆتوماتتى تۇردە جيناقتاپ، تالداپ، قىسقا ۋاقىتتىڭ ىشىندە قورىتىندىسىن شىعارادى»، - دەدى ءمينيستردىڭ مىندەتىن اتقارۋشى.

ونىڭ پايىمىنشا، بۇل قادام ادامي فاكتوردى تولىقتاي شەكتەپ، وبەكتيۆتىلىكتى ورناتۋعا ىقپال ەتەدى.

اتتەستاتتاۋدىڭ تەستىلەۋ ءراسىمى دە جەتىلدىرىلمەك. بارلىق ۇسىنىلعان وزگەرىستەر پەداگوگ قاۋىمداستىعىمەن ءجىتى تالقىلانعاننان كەيىن، جىل اياعىنا دەيىن پەداگوگتەردى اتتەستاتتاۋدىڭ قاعيدالارىنا ءتيىستى وزگەرىستەر بەكىتىلەدى.

«مەملەكەت باسشىسىنىڭ تاپسىرماسىنا سايكەس، ءبىلىم بەرۋ جۇيەسىندەگى مەنەدجمەنتتى جاقسارتۋ ماقساتىندا، ياعني پرەزيدەنتتىك جاستار كادرلىق رەزەرۆىنىڭ ۇلگىسى بويىنشا ءبىلىم بەرۋ سالاسىندا 1000 ماماندى ىرىكتەۋ جانە دايارلاۋ باعدارلاماسى جۇمىس توپتارىندا تالقىلاۋدان ءوتتى. باعدارلاماعا قازاقستان رەسپۋبليكاسىنىڭ ازاماتتىعى، جوعارى ءبىلىمى جانە كەمىندە 3 جىل پەداگوگيكالىق ەڭبەك ءوتىلى بار پەداگوگتەر جانە باسشىنىڭ ورىنباسارلارىن تارتۋ كوزدەلگەن. رەسپۋبليكالىق كادر رەزەرۆىنە دايارلاۋدىڭ جانە ەنگىزۋدىڭ 3 كەزەڭى ايقىندالدى. ءبىرىنشى - «ىرىكتەۋ»، ەكىنشى - «دايىندىقتان ءوتۋ»، ءۇشىنشى - «كادرلىق رەزەرۆكە ەنگىزۋ» كەزەڭدەرى. ءاربىر مودۋلدەن وتكەننەن كەيىن، ارالىق باعالاۋ جۇرگىزىلەدى، قورىتىندى باعالاۋ ناتيجەلەرى بويىنشا پەداگوگتەرگە جەتەكشى مەكتەپتەر بازاسىندا تاعىلىمدامادان ءوتۋ ۇسىنىلادى»، - دەدى ءمينيستردىڭ مىندەتىن اتقارۋشى.

وسى ورايدا ولارعا سەرتيفيكات تاپسىرىلىپ، ۇمىتكەرلەر كادرلىق رەزەرۆكە ەنگىزىلىپ، ءبىلىم بەرۋ ۇيىمدارىنىڭ باسشىلىق قىزمەتىنە كونكۋرسسىز نەگىزدە جۇمىسقا ورنالاسادى.

«وسىعان وراي، 2024-جىلدان باستاپ جىل سايىن جاڭا فورماتتاعى باسشىلاردىڭ، ءبىلىم بەرۋدەگى وزگەرىستەر كوشباسشىلارىنىڭ كادرلىق رەزەرۆى تولىقتىرىلاتىن بولادى. بۇل «جايلى مەكتەپ» ۇلتتىق جوباسى نەگىزىندە سالىناتىن ءبىلىم مەكەمەلەرىن باسشىلارىمەن قامتاماسىز ەتۋ ماسەلەسىنىڭ وڭ شەشىمىن تابۋىنا ىقپال ەتەدى»، - دەدى عاني بەيسەمبايەۆ.

بۇدان بۇرىن حابارلانعانداي، جاقىندا مەملەكەت باسشىسى قاسىم-جومارت توقايەۆ ءبىلىم بەرۋ جۇيەسىندەگى مەنەدجمەنتتى جاقسارتۋعا باسا ءمان بەرىلۋى ءتيىس ەكەنىن ايتتى.

«وسى سالاعا ناعىز كاسىبي مامانداردى تارتۋ قاجەت. بىزدە پرەزيدەنتتىك جاستار كادر رەزەرۆى بار. ءدال سول سياقتى ءبىلىم سالاسىنا وزگەرىس اكەلەتىن 1 مىڭ مامان ارنايى دايىندىقتان وتەتىن بولادى. وسىعان وراي ءتيىستى باعدارلاما قابىلدانادى. كادر ماسەلەسى جوعارى ءبىلىم بەرۋ جۇيەسى ءۇشىن دە وتە وزەكتى»، - دەدى پرەزيدەنت.