قازاقى ءيت تۇقىمدارىنىڭ ستاندارتى بەكىتىلدى

استانا. قازاقپارات – ق ر ەكولوگيا جانە تابيعي رەسۋرستار مينيسترلىگى قازاقى ءءيت تۇقىمدارى - تازى مەن توبەتتىڭ ستاندارتتارىن بەكىتتى، دەپ حابارلايدى قازاقپارات.

ستاندارت اتالعان ءيت تۇقىمدارىنىڭ سيپاتتاماسىن، ولشەمدەرىن، كەمشىلىكتەرى مەن اقاۋلارىن قامتيدى.

ماسەلەن، قازاقى تازىنىڭ بويى ورتا جانە ورتادان جوعارى، مىقتى دەنەسى بار ارىقتاۋ ءيت، سوزىلۋ يندەكسى - 103.

توبەت شوقتىعىنىڭ بيىكتىگى 60 سانتيمەتردەن 70 سانتيمەترگە دەيىن، قانشىقتىڭ شوقتىعى - 55 سانتيمەتردەن 65 سانتيمەترگە دەيىن.

بويىنىڭ جوعارعى شەكتەن اسىپ كەتۋى پروپورتسيا جانە ستاندارتتىڭ تالاپتارى ساقتالعان جاعدايدا اقاۋلىق نەمەسە كەمىستىك بولىپ سانالمايدى.

ءوڭى: قارا، اق، ءتۇرلى رەڭكتى اقشىل سارعىش، قىزىل جانە سۇردىڭ بارلىق رەڭكتەرى. بارلىق وڭدەر تۇتاس، ودان بولەك تەڭبىل بولۋى مۇمكىن.

تۇمسىعىندا، قۇلاعىندا، اياقتارىنىڭ ۇشتارىندا قارا داقتار بولۋى مۇمكىن. كۇشىكتەر ءوسۋ، جىنىستىق جەتىلۋ بارىسىندا ءتۇسىن جانە رەڭىن وزگەرتۋى مۇمكىن.

ءجۇنى جۇمساق، جىبەك ءتارىزدى، تىك، ۇزىندىعى 4,5 سانتيمەترگە (قىستا) جانە 2,5 سانتيمەترگە دەيىن (جازدا) بولادى، قىسقا ءجۇندى ءتۇبىتى جاقسى جەتىلگەن.

ساۋساقتارىنىڭ اراسىندا قىسقا جانە قاتتى شاش وسەدى. «جارعاق قۇلاق»، «تاقىر تازى» سياقتى تازىنىڭ تەگىس ءجۇندى تۇرلەرىنە (ىلگەگى مەن شاشاعى جوق) رۇقسات ەتىلەدى.

تەرىسى جۇقا، سوزىلعىش، قاتپارى جوق. بۇلشىق ەتتەرى جاقسى دامىعان، اسىرەسە بەلىندە، جامباسىندا، سۇيەكتەرى مىقتى، ءبىراق اۋىر ەمەس.

وسىلايشا قۇجاتتا قازاقى تازىنىڭ قۇلاعى، كوزى، ءتىسى، اياقتارى مەن تاباندارىنا دەيىن سيپاتتاما جازىلعان.

ودان بولەك، قازاقى توبەتتىڭ دە ستاندارتى بەكىتىلدى.

ونى كۇشتى جانە ءتوزىمدى، باسى اۋىر، قاس ۇستىندەگى جانە بەت سۇيەكتەرى دوعالارى جەتىلگەن، قارالاۋ مويىنى جانە جەلكەنىڭ تومپەشىگى بار دەپ سۋرەتتەلەدى.

باسسۇيەگى بىركەلكى كەڭ، سوپاقشا، ۇزىن. ماڭدايى تەگىس، ورتا تۇسىندا كىشىگىرىم ويىعى بار. ارقاسى قۋاتتى، كەڭ، بۇلشىق ەتى جاقسى جەتىلگەن.

كەۋدەسى: دوعال قيىلىستى، اۋقىمدى، ۇزىن، تەرەڭ، جاۋىرىنى سىرتىنا قاراي كەڭەيە تۇسكەن، شىنتاعىنا دەيىن نەمەسە ءسال تومەن تۇسىڭكى، شەتكى قابىرعاسى ۇزىن. قارنى بىركەلكى تارتىلعان.

ەركىن تۇرعاندا ءيت ءوزىن بوس ۇستايدى. قوزعالعاندا نەمەسە ەلەگىزىپ تۇرعاندا شوقتىعىنىڭ جوعارعى جاعى تىك، سەرىپپەلى، بەرىك بولىپ كەلەدى.

بۇلشىق ەتى قۋاتتى، ومىرتقانىڭ يىندىك ءوسىمى بىلىنبەيدى.

قۇيرىعى جوعارى كوتەرىلگەن، جۋان. كۇشىك كەزىندە قىسقارىپ، كەلتەلەنەدى (كوبىنە ۇزىندىعىنىڭ 1/3-گە جۋىعى قالادى). قىسقارىپ كەلتەلەنبەگەن كەزىندە وراق ءتارىزدى تۇسىڭكى بولادى.

تەرىسى قالىڭ، تىعىز، مويىن تۇسىندا وزىنە ءتان قاتپار بار. ءجۇنى دە قالىڭ، ءىرى، تىك، ءجۇن استىنداعى ءتۇبىتى جاقسى وسكەن، ءبىراق ۇزىن بولمايدى.

باسىندا جانە ۇستىڭگى الدىڭعى جاق ءجۇنى قىسقا، تىك وسكەن، تىعىزدالا جىمداسقان.

مويىنىنداعى ۇزىن ءجۇن جابىنى «جاعالىق» دەپ اتالادى، اسىرەسە توبەتتەردە جاقسى وسەدى، بوكسەسىنىڭ ارتقى جاعى «شالبار» ىسپەتتى.

تاماعىندا، مويىناستى قاتپار تۇسىندا ءجۇنى وتە قالىڭ ءارى تىعىز بولادى.

ايتا كەتەيىك، بيىل قاڭتار ايىندا ق ر پرەزيدەنتى قاسىم-جومارت توقايەۆ قازاقى ءيت تۇقىمدارىن ساقتاۋ تۋرالى زاڭعا قول قويعان ەدى.

ستاندارتتىڭ تولىق ءماتىنىن ورمان شارۋاشىلىعى جانە جانۋارلار دۇنيەسى كوميتەتىنىڭ سايتىنان وقۋعا بولادى.

اتالعان بۇيرىق 2023-جىلعى 1- شىلدەدەن باستاپ كۇشىنە ەنەدى.