استانالىق وقۋشىلار قانداي ۇيىرمەلەرگە بارىپ ءجۇر

استانا. قازاقپارات - استانا قالاسى ءبىلىم باسقارماسى باسشىسىنىڭ ورىنباسارى مارجان قايىربايەۆا قوسىمشا ءبىلىم بەرۋدەگى جاڭا جوبالار تۋرالى ايتىپ بەردى، دەپ حابارلايدى قازاقپارات ءتىلشىسى.

ونىڭ ايتۋىنشا، بالالارعا قوسىمشا ءبىلىم بەرۋ باعدارلاماسى ءبىلىم مەكەمەلەرىندە جانە مەكتەپتەن تىس ۇيىمداردا دا جۇزەگە اسىرىلادى.

«قازىرگى ۋاقىتتا قالادا 2 وقۋشىلار سارايى، 3 بالالار مۋزىكا مەكتەبى، 2 ونەر مەكتەبى، 1 بالالار كوركەمسۋرەت مەكتەبى، 1 تەحنيكالىق شىعارماشىلىق ورتالىعى، «وركەن» بالالار- جاسوسپىرىمدەر دەنە تاربيەسى ورتالىعى جۇمىس ىستەيدى. بۇگىنگى تاڭدا 152546 بالا قوسىمشا ءبىلىم بەرۋمەن قامتىلعان، بۇل - جالپى بالا سانىنىڭ 76,8 پايىزى»، - دەدى م. قايىربايەۆا استانا كوممۋنيكاتسيالار قىزمەتىندە وتكەن بريفينگتە.

سونىمەن بىرگە، حالىقتىڭ الەۋمەتتىك وسال توپتارىنان 24 مىڭنان استام بالا جانە ەرەكشە ءبىلىم بەرۋ قاجەتتىلىكتەرى بار 565 بالا ۇيىرمەلەر مەن سەكتسيالارعا جەڭىلدىكپەن جانە تەگىن بارادى.

مەكتەپتەن تىس ۇيىمداردا جانە جالپى مەكتەپتەردە سپورت سەكسيالارىمەن قامتىلعان ءبىلىم الۋشىلار ۇلەسى - % 44,5.

وسى ماقساتتا ءبىلىم بەرۋ ۇيىمدارىندا 910 سپورت سەكسياسى جۇمىس ىستەيدى، 92 مەكتەپتە اشىق اۋادا كوپفۋنكتسيونالدى سپورت الاڭدارى (جۇگىرۋ جولدارى، فۋتبول، باسكەتبول جانە ۆولەيبول الاڭدارى)، 8 مەكتەپتە - ستاتسيونارلىق حوككەي كورتتارى جانە 10 تەننيس كورتى بار.

ەلوردانىڭ 40 مەكتەبىندە 3,8 مىڭ بالا ۇلتتىق سپورت تۇرلەرىمەن، 5,3 مىڭ - بالا ۇلتتىق ونەرمەن اينالىسادى.

سونداي- اق، وقۋشىلار تەاترلارعا تەگىن بارادى. جىل سوڭىنا دەيىن 50 مىڭنان استام بالانى قامتۋ جوسپارلانعان.

جالپى ءبىلىم بەرەتىن مەكتەپتەردە ۇلتتىق سپورت تۇرلەرى (توعىزقۇمالاق، قازاق كۇرەسى، اسىق اتۋ)، ۇلتتىق ونەر (ۇلتتىق اسپاپتار، دومبىرا جانە ءداستۇرلى ءان، قازاق ءبيى، قازاق ءانى) بويىنشا ALTYN URPAQ جوباسى ىسكە اسىرىلۋدا.

بۇل جوبا ەلوردانىڭ 40 مەكتەبىندە 10000-نان استام بالانى قامتىعان.

«وقۋ جىلىنىڭ تاعى ءبىر جاڭالىعى - ءار مەكتەپتە دومبىرا سىنىپتارىن اشۋ، وقۋشىلار اراسىنان دومبىرا وركەسترلەرىن قۇرۋ بولدى. قازىر 64 دومبىرا ۇيىرمەسى جۇمىس ىستەيدى، 1656 بالا 44 ۇيىرمەدە، اقىلى نەگىزدە 702 وقۋشى قاتىسادى»، - دەيدى مارجان قايىربايەۆا.

قازاقستان شاحمات فەدەراتسياسىمەن بىرلەسىپ، قالا مەكتەپتەرىندە 53 شاحمات ۇيىرمەسى اشىلعان، وعان 1,4 مىڭ وقۋشى بارىپ ءجۇر.

م. وتەمىسوۆ اتىنداعى وقۋشىلار سارايىندا قۇرامىندا 127 ۇيىم (94 مەكتەپ پەن 33 كوللەدج) جانە 69 مىڭ قاتىسۋشىسى بار «مەكتەپ جانە ستۋدەنتتىك پارلامەنت» جەدەل شتابى جۇمىس ىستەيدى.

ەرەكشە ءبىلىم بەرۋ قاجەتتىلىكتەرى بار بالالاردى الەۋمەتتەندىرۋ ماقساتىندا وقۋشىلار سارايىندا AIALA الەۋمەتتىك جوباسى اشىلعان.

وندا 200-دەن استام بالا روبوتوتەحنيكا، ۆوكال، بەينەلەۋ ونەرى، كاراتە، ماتەماتيكا، ءجۇزۋ، ەرتە مۋزىكالىق دامۋ، دومبىرا، تەاتر ۇيىرمەلەرىنە بارادى.

«الداعى ۋاقىتتا قوسىمشا ءبىلىم بەرۋ ۇيىمدارىنىڭ جەلىسىن دامىتۋ جۇمىسى جالعاسادى. وسىعان بايلانىستى ءبىلىم باسقارماسىنىڭ 2029 -جىلعا دەيىنگى جول كارتاسى بەكىتىلدى. 2029 -جىلعا دەيىن 20040 ورىندىق قوسىمشا بىلىمگە مەملەكەتتىك تاپسىرىس بەرۋ جوسپارلانعان»، - دەدى سپيكەر.

اۆتور

ايجان سەرىكجان قىزى