ءاليحان سمايىلوۆ بەنزين باعاسى ءوسۋىنىڭ ينفلياتسياعا اسەرى تۋرالى ايتتى

استانا. قازاقپارات - پرەمەر-مينيستر ءاليحان سمايىلوۆ بەنزين باعاسىنىڭ قىمباتتاۋى ينفلياتسياعا قالاي اسەر ەتەتىنىن ايتىپ بەردى، دەپ حابارلايدى قازاقپارات ءتىلشىسى.

«جانار-جاعارماي باعاسىنىڭ ءوسىمى بەلگىلى ءبىر دەڭگەيدە ينفلياتسياعا اسەر ەتەدى. تىكەلەي ىقپالىن الىپ قاراساق، 0,4 مولشەرىندەگى ديزەل وتىنى مەن اي-92 بەنزينىنىڭ تۇتىنۋ ۇلەسىن ەسكەرە وتىرىپ، ورتا ەسەپپەن جان باسىنا شاققاندا، ينفلياتسياعا اسەرى شامامەن %0,35 بولادى. بۇل - تىكەلەي اسەر»، - دەدى ءاليحان سمايىلوۆ ۇكىمەت وتىرىسىنان كەيىن ب ا ق وكىلدەرىنىڭ ساۋالىنا.

ونىڭ ايتۋىنشا، جانار-جاعارماي باعاسى ءوسۋىنىڭ ينفلياتسياعا جاناما اسەرى دە بولادى.

«ديزەل مەن بەنزين وندىرۋشىلەردىڭ شىعىندارىن ەسكەرسەك، ينفلياتسياعا بەلگىلى ءبىر مۋلتيپليكاتيۆتى اسەر بولادى. دەگەنمەن مەملەكەت باسشىسى بىزگە جىل سوڭىنا قاراي ينفلياتسيا دەڭگەيىن ەكى ەسەگە تومەندەتۋ مىندەتىن قويىپ وتىر. سوندىقتان ۇكىمەت ينفلياتسيالىق پروتسەستەردى تەجەۋ بويىنشا جۇيەلى جانە جەدەل شارالار قابىلداپ جاتىر»، - دەپ اتاپ ءوتتى پرەمەر-مينيستر.

«ناۋرىز ايىنىڭ قورىتىندىسى بويىنشا ينفلياتسيا قارقىنىنىڭ ايتارلىقتاي باياۋلاعانىن كورىپ وتىرمىز. ەگەر اقپان ايىندا جىلدىق ينفلياتسيا - %21,3 بولسا، ناۋرىزدا كورسەتكىش - %18,1 بۇل ءۇردىس ودان ءارى جالعاسادى، ينفلياتسيالىق پروتسەستەردى تەجەۋگە باعىتتالعان شارالار كەشەنىن بەلسەندى تۇردە ىسكە اسىرامىز»، - دەپ تولىقتىردى ءا. سمايىلوۆ.

بۇعان دەيىن ۇكىمەت باسشىسى ەلىمىزدەگى ارزان جانارماي ءارتۇرلى جولمەن كورشى ەلدەرگە كەتىپ جاتقانىن ايتقان ەدى.