اۋىلدا ءۇي سالاتىن قۇرىلىس كومپانيالارىن سۋبسيديالاۋ باستالدى
بۇل جايىندا يندۋستريا جانە ينفراقۇرىلىمدى دامۋ ءمينيسترىنىڭ مىندەتىن اتقارۋشى مارات قارابايەۆ ءمالىم ەتتى، دەپ حابارلايدى قازاقپارات ءتىلشىسى.
«حالىقتىڭ اۋىلدىق جانە شەكارا ماڭىنداعى اۋماقتاردان كوشۋىن ازايتۋ ماقساتىندا ءبىرىنشى كەزەكتە جاڭا وندىرىستەردى ىسكە قوسۋ ارقىلى تۇراقتى جۇمىس ورىندارىن قۇرۋ جوسپارلانىپ وتىر. اتالعان جوبالار ونەركاسىپ قورىندا كوزدەلگەن قاراجات ەسەبىنەن جۇزەگە اسىرىلماق»، - دەدى مارات قارابايەۆ ۇكىمەت وتىرىسىندا.
سونداي- اق، سپيكەر اۋىل تۇرعىندارىن باسپانامەن قامتۋ ماسەلەسىن قوزعادى.
«اۋىل تۇرعىندارىنا جالعا بەرىلەتىن تۇرعىن ءۇي سالۋشىلاردىڭ شىعىندارىن سۋبسيديالاۋ تەتىگى ىسكە قوسىلدى. وسى تەتىك ارقىلى اۋىل ازاماتتارىنا 2855 تۇرعىن ءۇي سالۋ جوسپارلانعان (14,3 ميلليارد تەڭگە). بۇدان باسقا، اۋىلدا جەكە تۇرعىن ءۇي قۇرىلىسىن ىنتالاندىرۋ ماقساتىندا جىل سايىن 22 مىڭ جەر ۋچاسكەسى ينجەنەرلىك كوممۋنيكاتسيامەن قامتاماسىز ەتىلەدى»، - دەيدى ول.
ونىڭ ايتۋىنشا، ۇلتتىق ينفراقۇرىلىمدىق جوسپاردى ازىرلەۋ ءۇشىن مۇددەلى مەملەكەتتىك جانە جەرگىلىكتى اتقارۋشى ورگاندار وكىلدەرىنەن تۇراتىن جۇمىس توبى قۇرىلادى.
«حالىقتىڭ ساپالى تىنىس- تىرشىلىك دەڭگەيىن ارتتىرۋ جانە ينفراقۇرىلىمدىق دامۋدىڭ نەگىزگى پروبلەمالارىن شەشۋ مىندەتى تۇر. جوسپار بويىنشا بازالىق ينفراقۇرىلىم جوبالارى، ونىڭ ىشىندە اۆتوموبيل جانە تەمىر جولمەن، اۆياجەلىلەرمەن، سۋمەن، جىلۋمەن، گازبەن جانە ەلەكترمەن جابدىقتاۋ، سونداي- اق بايلانىس، تەلەكوممۋنيكاتسيامەن (تەلەفون، ينتەرنەت) جانە باسقا ينفراقۇرىلىممەن قامتاماسىز ەتۋ كوزدەلەدى»، - دەيدى ءمينيستردىڭ مىندەتىن اتقارۋشى.
اۆتور
داۋلەت ىزتىلەۋ
