تۆيتتەر لوگوتيپىندەگى قۇستى ءيت بەينەسىنە اۋىستىردى
جاڭا لوگوتيپتى جەلىنىڭ بەتىنەن كورۋگە بولادى، دەپ حابارلايدى قازاقپارات تاسس اكپارات اگەنتتىگىنە سىلتەمە جاساپ.
بۇل وزگەرىس تۇراقتى نەگىزدە جاسالدى ما، ازىرگە بەلگىسىز. الەۋمەتتىك جەلى بلوگىندا، Twitter قولداۋ پاراقشاسىندا، سونداي-اق الەۋمەتتىك جەلى يەسى يلون ماسكتىڭ پاراقشاسىندا بۇل ماسەلەگە قاتىستى ەشقانداي تۇسىنىكتەمە بەرىلگەن جوق.
Bloomberg اگەنتتىگىنىڭ مالىمەتىنشە، وزگەرىس ەنگىزىلگەننەن بەرى Binance كريپتوۆاليۋتا بيرجاسىندا Dogecoin قۇنى %30 عا وسكەن.
ماسك ءوزىنىڭ Twitter- ىندە Dogecoin تۋرالى بىرنەشە رەت وڭ پىكىر قالدىرعان. وسىلايشا، 2021 -جىلدىڭ ءساۋىر ايىنىڭ باسىندا ول «Dogecoin-دى ايعا ۇشىرۋعا» ۋادە بەردى، ال مامىردا ول ءوزىنىڭ SpaceX كومپانياسى 2022 -جىلى وسى كريپتوۆاليۋتامەن تولىعىمەن تولەنگەن كەلىسىمشارت بويىنشا ايعا سپۋتنيك ۇشىراتىنىن ءتۇسىندىردى. 2022 -جىلدىڭ قاڭتارىندا ماسكتىڭ باسقا كومپانياسى Tesla ءوزىنىڭ كەيبىر ونىمدەرى ءۇشىن تولەم رەتىندە Dogecoin قابىلدايتىنىن جاريالادى.
2022 -جىلدىڭ قىركۇيەگىندە ينۆەستورلار ماسك پەن ونىڭ ءبىرقاتار سەرىكتەستەرىن Dogecoin كريپتوۆاليۋتاسىنىڭ باعاسىن ەكى جىل ىشىندە 36 مىڭ پايىزعا ادەيى ءوسىردى دەپ ايىپتادى.
اۆتور
زارينا تۋعانبايەۆا
