قاراعاندى وبلىسىندا كاسىپكەرلەر مالدىڭ ءىش مايىنان كىر سابىن شىعارادى
ولار ءونىمنىڭ سىناق پارتيالارىن شىعارىپ- اق قويعان جانە وعان ساپا سەرتيفيكاتىن راسىمدەۋدە، دەپ حابارلايدى قازاقپارات ءتىلشىسى.
جاڭاتوعان اۋىلىندا تۇراتىن نەمەرە اعايىندى دۋمان قوجەكين مەن مەيىرلان بوداۋ ءۇيىنىڭ اۋلاسىندا كىر سابىن شىعاراتىن شاعىن سەح اشتى. بۇل ىسكە كىرىسپەس بۇرىن ولار الماتىدا كۋرستاردا وقىپ، ينتەرنەت ارقىلى وسى تاۋاشانى زەرتتەگەن ەكەن. ءوز قاراجاتىن سالىپ، ولار قىرعىزستاندا قاراپايىم ەت تارتقىشپەن جۇمىس ىستەۋ پرينتسيپىنىڭ ۇقساستىعىنا بايلانىستى ەت تارتقىش دەپ اتالاتىن اپپاراتتى ساتىپ الدى.
«بۇرىن اعام ەكەۋمىز مال شارۋاشىلىعىمەن اينالىساتىنبىز. وتكەن جىلى اۋدان اكىمىنىڭ گرانتىن الىپ، قىمىز ءوندىرىسىن جولعا قويدىم. سونىمەن قاتار، ءبىز كىر سابىن شىعاراتىن سەحتى ىسكە قوسۋ قاجەت دەپ شەشتىك. بىزدە بىرەگەي رەتسەپت بار، ونىڭ ارقاسىندا كەرەمەت ساپالى جانە ارزان سابىن الامىز. نەگىزگى قۇرامى - جانۋارلاردىڭ ءىش مايى. ءبىز سىناق پارتيالارىن شىعارىپ جاتقاندا، اۋىل تۇرعىندارى بىزگە جانۋارلاردىڭ مايىن ساتا باستادى. ونىڭ ورنىنا ءبىز ولارعا سابىن بەرەمىز نەمەسە اقشا تولەيمىز. ءبىزدىڭ اۋداننىڭ دۇكەندەرىنە بىرنەشە پارتيا جىبەرىلدى. سابىن سۇرانىسقا يە. ساپا سەرتيفيكاتىن العاننان كەيىن ءبىز ۇلكەن كولەمدە ساتىلىمداردى باستايمىز جانە باسقا نارىقتارعا شىعامىز»، - دەيدى مەيىرلان بوداۋ.
اعايىندى كاسىپكەرلەر سابىندى تۋعان اۋىلى جاڭاتوعاننىڭ اتىمەن اتادى. ولار ونى 150، 200، 250 گرام بولاتىن ءۇش تۇردە شىعارادى. تاۋلىگىنە سەح مىڭعا دەيىن ءونىم شىعارا الادى.
«ءبىز مۇنداي قۋاتقا ءالى شىققان جوقپىز، ويتكەنى ءبىز ساپا سەرتيفيكاتىن كۇتىپ وتىرمىز. بولاشاقتا وبلىس اكىمىنىڭ گرانتىنا ارنالعان كونكۋرسقا قاتىسقىمىز كەلەدى. ەگەر الساق، سابىن وراۋ ءۇشىن اپپارات ساتىپ الامىز. ارينە، ءوندىرىستى ۇلعايتا وتىرىپ، بىرنەشە ادامدى جۇمىسقا الامىز»، - دەيدى مەيىرلان.
جاڭاتوعان كىر سابىنىنىڭ باعاسى ورتاشا نارىقتىق قۇننان 10 پايىز تومەن. وندىرۋشىلەر ونى كوتەرمەيمىز دەيدى. سونداي- اق، بولاشاقتا كاسىپكەرلەر ءونىم اسسورتيمەنتىن كەڭەيتىپ، حوش ءيىستى جانە سۇيىق سابىن شىعارماقشى.
اۆتور
اگاتا مۋحامەدجانوۆا
