تەمىرجول بويىندا قاراۋسىز جۇرگەن بىرنەشە مالدى پويىز قاعىپ كەتتى
بۇل تۋرالى قازاقپارات كولىكتەگى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ حابارلايدى.
پاۆلودار وبلىسىنىڭ ماي- جۇمىسكەر جانە جۇمىسكەر- كوكتوبە ارالىقتارىندا بىردەن ەكى وسىنداي جاعداي بولدى. ەكى ءىرى قارا مال جولاۋشىلار جانە جۇك پويىزدارىنىڭ استىنا تۇسكەن. تەمىرجول كولىگىنىڭ جوسپارلانباعان جالپى توقتاۋ ۋاقىتى 33 مينۋتتى قۇرادى.
وسىعان ۇقساس جاعداي اباي وبلىسىنىڭ سۋىقبۇلاق- رزد-6 ارالىعىندا دا بولدى. ەكى ءىرى قارا مالدىڭ تەمىرجول بويىندا جۇرۋىنە بايلانىستى جۇك پويىزى ماشينيسىنىڭ شۇعىل تەجەۋ قولدانۋىنا تۋرا كەلدى.
مال يەلەرىنە قاتىستى ق ر ا ق ب ت ك 559-بابى، ياعني تەمىرجولداردىڭ بولىنگەن جولاعىندا مال جايۋ قاعيدالارىن بۇزۋ بويىنشا اكىمشىلىك حاتتاما تولتىرىلدى.
سونداي- اق، قاراعاندى وبلىسىنىڭ قىزىلجار- جەڭىس ارالىعىندا ءۇش جىلقى، ال شىمكەنت ستانسياسىندا ءۇش ۇساق مال جۇك پويىزىنىڭ استىنا تۇسكەن. پويىزداردىڭ تۇراعى ەكى جاعدايدا دا 11 مينۋتتى قۇرادى.
«اتالعان فاكتىلەر بويىنشا دا ءۇي جانۋارلارىنىڭ يەلەرىنە اكىمشىلىك حاتتامالار تولتىرىلدى»، - دەلىنگەن حابارلامادا.
كولىك پوليتسەيلەرى تۇرعىندارعا تەمىرجول ماڭىندا ءۇي جانۋارلارىن جايۋ كەزىندە قاۋىپسىزدىك شارالارىن ساقتاۋ كەرەكتىگىن تاعى دا ەسكە سالدى.
