دوكتورانتۋراعا ءتۇسۋ ءۇشىن ەڭبەك ءوتىلى ۇلعايتىلدى - مەملەكەتتىك باسقارۋ اكادەمياسى

استانا. قازاقپارات – ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل مەملەكەتتىك قىزمەتشىلەردى دايارلاۋداعى وزگەرىستەردى باياندادى، دەپ حابارلايدى قازاقپارات ءتىلشىسى.

«اكادەميادا مەملەكەتتىك تاپسىرىسپەن B+ (GPA 3,33) مانىنەن تومەن ەمەس ناتيجەسىمەن وقۋ بىتىرگەن ادامدار ءبىر جىلدا جەرگىلىكتى اتقارۋشى ورگانداردا، ءماسليحاتتار اپپاراتتارىندا، ريەۆيزيالىق كوميسسيالاردا، ورتالىق مەملەكەتتىك ورگانداردىڭ جانە ولاردىڭ ۆەدومستۆولارىنىڭ اۋماقتىق بولىمشەلەرىندە (استانا مەن ونىڭ اۋداندارىنداعى جاو، ءماسليحات اپپاراتىنان، ريەۆيزيالىق كوميسسيالاردان، ورتالىق مەملەكەتتىك ورگاندار مەن ولاردىڭ ۆەدومستۆولارىنىڭ اۋماقتىق بولىمشەلەرىنەن باسقا) «ب» كورپۋسىنىڭ مەملەكەتتىك اكىمشىلىك لاۋازىمدارىنا مەملەكەتتىك قىزمەت ىستەرى اگەنتتىگىمەن جانە ونىڭ اۋماقتىق بولىمشەلەرىمەن كەلىسۋ بويىنشا كونكۋرسسىز ورنالاسا الادى. ەكىنشىدەن، اكادەميا بىتىرگەن مەملەكەتتىك قىزمەتشىنىڭ ءوزىن وقۋعا جىبەرگەن مەملەكەتتىك ورگاندا جۇمىسپەن وتەۋ مىندەتى الىنىپ تاستالدى. ەندى مەملەكەتتىك قىزمەتشىگە اكادەميادا وقۋىن اياقتاعان سوڭ مەملەكەتتىك قىزمەتتە 3 جىل جۇمىس ىستەۋ/جۇمىسپەن وتەۋ جەتكىلىكتى»، - دەدى اكادەميا رەكتورى بۇگىنگى باسپا ءسوز ءماسليحاتىندا.

سونىمەن بىرگە، جوعارى وقۋ ورىندارىندا ج و و- دان كەيىنگى ءبىلىم بەرۋ باعدارلامالارى بويىنشا مەملەكەتتىك تاپسىرىسپەن بۇرىن ءبىلىم العان مەملەكەتتىك قىزمەتشىلەر اكادەميانىڭ ماگيستراتۋراسىنا نەمەسە دوكتورانتۋراسىنا قايتادان مەملەكەتتىك تاپسىرىسپەن وقۋعا تۇسە الادى.

بيىل اكادەمياعا ءتۇسۋ ەرەجەلەرى بويىنشا دا ءبىرقاتار جاڭاشىلدىق بار. «حالىقارالىق قاتىناستار» باعدارلاماسىندا وقۋ مەرزىمى سىرتقى ساياسات پەن حالىقارالىق ىنتىماقتاستىقتى ىسكە اسىرۋ ءۇشىن كادر دايارلاۋدى كۇشەيتۋ، ونىڭ ىشىندە شەت تىلدەرى بويىنشا تىلدىك دايارلىقتى كۇشەيتۋ ماقساتىندا 2 جىلعا دەيىن ۇزارتىلدى. دوكتورانتۋرا باعدارلامالارى ءۇشىن جۇمىس ءوتىلى بويىنشا تالاپ 3 جىلدان 5 جىلعا دەيىن ۇلعايتىلدى.

وتكەن جىلى باسشى قول قويعان جولدامانى الدىن الا وقۋعا ءتۇسۋ كەزىندە، ياعني كونكۋرستىق ىرىكتەۋدەن كەيىن تاپسىرۋعا مۇمكىندىك بەرىلسە، بيىل ۇمىتكەرلەر جۇيەگە قول قويىلعان جولدامانى 29- ماۋسىمدى قوسا ەسەپتەگەندە قۇجات قابىلداۋ اياقتالعانشا تىركەۋى كەرەك.

بيىلدان باستاپ مودۋلدىك وقىتۋ قاعيداتى بويىنشا ماگيستراتۋرا مەملەكەتتىك قىزمەتشى ەمەس تۇلعالارعا، ياعني كۆازيمەملەكەتتىك جانە جەكە سەكتور وكىلدەرىنە عانا ارنالادى.

وتىنىمدەر قابىلداۋ پروتسەسى 3- ساۋىردەن 29- ماۋسىمعا دەيىن 3 ايعا سوزىلادى. كونكۋرستىڭ ءبىرىنشى كەزەڭى - اناليتيكالىق ەسسە جازۋ ءۇشىن 5 شىلدەدەن 14- شىلدەگە دەيىنگى كەزەڭ قاراستىرىلعان. دوكتورانتۋراعا ۇمىتكەرلەر زەرتتەۋ جۇمىسىنىڭ جوسپارىن (Research proposal) 29 ماۋسىمعا دەيىن جۇكتەۋى ءتيىس، جوسپار 16- شىلدەگە دەيىن (سول كۇندى قوسا ەسەپتەگەندە) باعالانادى.

قورىتىندى كەزەڭ - سۇحباتتاسۋ، 17- شىلدە مەن 4- تامىز كۇندەرى اكادەميادا وفلاين فورماتتا وتەدى. 7- تامىزدا ارالىق قورىتىندى شىعارىلادى - الدىن الا قابىلدانعان ۇمىتكەرلەر ءتىزىمى جاريالانادى، ال 14- تامىزدا كەلىسىمشارتتارعا قول قويىلعان سوڭ وقۋعا قابىلداۋ تۋرالى بۇيرىق شىعادى.

ايتا كەتەيىك، مەملەكەتتىك باسقارۋ اكادەمياسى 29- ماۋسىمعا دەيىن ماگيستراتۋرا مەن دوكتورانتۋراعا قۇجات قابىلدايدى. وعان مەملەكەتتىك قىزمەتشىلەر، سونداي-اق كۆازيمەملەكەتتىك جانە جەكە سەكتوردان ۇمىتكەرلەر قاتىسا الادى. بيىل ۇكىمەت ماگيستراتۋراعا 120 گرانت جانە دوكتورانتۋرا باعدارلاماسى بويىنشا - 12 گرانت بولگەن.