سەرىك كۇدەبايەۆ رەسمي پۋنكتەر ارقىلى قازاقستان شەكاراسىنان وتكەن جوق – ۇ ق ك

استانا. قازاقپارات - سەرىك كۇدەبايەۆ قازاقستاننىڭ مەملەكەتتىك شەكاراسىنان رەسمي جۇمىس ىستەپ تۇرعان بەكەتتەر ارقىلى وتكەن جوق.

بۇل تۋرالى ۇلتتىق قاۋىپسىزدىك كوميتەتى شەكارا قىزمەتىنەن ءمالىم ەتتى، دەپ حابارلايدى قازاقپارات.

«ۇلتتىق قاۋىپسىزدىك كوميتەتى شەكارا قىزمەتى ازامات سەرىك مىرزاقۇل ۇلى كۇدەبايەۆتىڭ رەسمي جۇمىس ىستەپ تۇرعان وتكىزۋ پۋنكتەرى ارقىلى قازاقستان رەسپۋبليكاسىنىڭ مەملەكەتتىك شەكاراسىنان وتپەگەنىن حابارلايدى.

بۇگىنگى كۇنى شەكتەس مەملەكەتتەردىڭ شەكارا وكىلدەرى اپپاراتىمەن بىرلەسە وتىرىپ، تەكسەرۋ تاعايىندالدى. تەكسەرۋ ناتيجەسى قوسىمشا حابارلاناتىن بولادى»، - دەلىنگەن حابارلامادا.

ەسكە سالايىق، الماتى وبلىستىق پوليتسيا دەپارتامەنتىنىڭ بۇرىنعى باسشىسى س. كۇدەبايەۆ 3- ءساۋىر كۇنى ساعات 10:00 دە سوتقا جەتكىزىلۋى ءتيىس ەدى. الايدا، پروكۋرور كۇدىكتىنى الىپ كەلۋ تۋرالى قاۋلىنى ورىنداۋ بارىسىندا س. كۇدەبايەۆتىڭ ەلدەن كەتىپ قالعانى تۋرالى مالىمەت ۇسىنعان.

«بۇگىنگى تاڭدا قىلمىستىق-پروتسەستىك كودەكستىڭ 324-بابىنا سايكەس، ءىس ىزدەۋ جاريالانۋىنا بايلانىستى توقتاتىلدى. ءىس ىزدەۋدى قاداعالاۋ ءۇشىن جەتىسۋ وبلىستىق پروكۋراتۋراسىنا جىبەرىلدى»، - دەلىنگەن تالدىقورعان قالالىق سوتىنىڭ حابارلاماسىندا.

ءمالىم بولعانداي، سەرىك كۇدەبايەۆقا حالىقارالىق ىزدەۋ جاريالاندى.

«پروكۋراتۋرا قىرعىز رەسپۋبليكاسىنىڭ شەكارا قىزمەتىنەن العان اقپاراتقا سايكەس، كۇدەبايەۆ 23- ناۋرىز كۇنى بىشكەك قالاسىنداعى ماناس حالىقارالىق اۋەجايىنان تۇركيانىڭ ىستامبۇل قالاسىنا ۇشىپ كەتكەن. بۇل شەكارا قىزمەتىنىڭ دەرەكتەر بازاسىمەن دالەلدەنگەن. سوتتالۋشىنىڭ مۇنان ارى وزگە ەلدەرگە ءجۇرىپ-تۇرۋىنىڭ الدىن الۋ جانە تۇرعىلىقتى جەرىن انىقتاۋ ءۇشىن شۇعىل تۇردە كۇدەبايەۆقا حالىقارالىق ىزدەۋ جاريالاپ، وعان بۇلتارتپاۋ شاراسىن تۇتقىنعا الۋعا وزگەرتۋ قاجەت»، - دەدى الەۋمەتتىك جەلىدە تاراعان ۆيدەودا سۋديا.

تالدىقورعان قالالىق سوتىنىڭ Facebook پاراقشاسىندا جاريالانعان اقپاراتقا قاراعاندا، س. كۇدەبايەۆ اۋىرىپ قالۋىنا بايلانىستى بىرنەشە رەت سوت وتىرىسىنا كەلمەگەن.

ونىڭ اۋرۋحاناعا تۇسكەنىن دالەلدەيتىن انىقتامانى ادۆوكاتى سوتقا ۇسىنعان. وسىعان بايلانىستى سوت وتىرىسى كەيىنگە شەگەرىلىپ كەلدى.

ايتا كەتەيىك، الماتى وبلىستىق پوليتسيا دەپارتامەنتىنىڭ بۇرىنعى باسشىسى سەرىك كۇدەبايەۆ قاڭتار وقيعاسى بويىنشا كۇدىكتى دەپ تانىلعان ەدى.

ول 2020-جىلدان باستاپ 2022-جىلدىڭ قاڭتارىنا دەيىن الماتى وبلىسى پوليتسيا دەپارتامەنتىنىڭ باستىعى قىزمەتىن اتقارعان.

2022-جىلدىڭ 18- اقپانىندا ول ىشكى ىستەر ورگاندارىنان ءوز ەركىمەن بوساتىلدى.