ىلەسپە اۋدارماشىلار كۋرسىن ۇيىمداستىرۋ ماسەلەسى قاراستىرىلۋدا

استانا. قازاقپارات - ىلەسپە اۋدارماشىلاردى دايىنداۋ كۋرستارىن ۇيىمداستىرۋ ماسەلەسى قاراستىرىلىپ جاتىر.

بۇل جايىندا سەنات دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.

«قازاقستان رەسپۋبليكاسىنداعى ءتىل ساياساتىن ىسكە اسىرۋدىڭ 2020-2025-جىلدارعا ارنالعان مەملەكەتتىك باعدارلاماسىن جانە قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2019-جىلدارعا ارنالعان مەملەكەتتىك باعدارلاماسىن ىسكە اسىرۋ اياسىندا مەملەكەتتىك قىزمەتشىلەرگە ىلەسپە اۋدارمانى وقىتۋ كۋرستارى جۇرگىزىلدى. اتاپ ايتقاندا، 2017-جىلدان بەرى 131 ادام قازاق-ورىس، ورىس-قازاق، اعىلشىن-قازاق، قازاق-اعىلشىن تىلدەرىندە ىلەسپە اۋدارما جۇرگىزۋ كۋرستارىندا وقىدى. اتالعان كۋرستار اياسىندا ىلەسپە اۋدارماشىلاردىڭ بىلىكتىلىگىن ارتتىرۋ، اۋدارما تەورياسى، اۋىزشا اۋدارمانىڭ ەرەكشەلىكتەرى، ىلەسپە اۋدارماعا قاجەتتى بازالىق گرامماتيكالىق جانە فرازەولوگيالىق ۇلگىلەر، سوزدىك قوردى بايىتۋ بويىنشا دارىستەر جۇرگىزىلدى»، - دەپ اتاپ وتەدى ۇكىمەت باسشىسى.

ونىڭ دەرەگىنشە، «جوعارى جانە جوعارى وقۋ ورنىنان كەيىنگى ءبىلىمى بار كادرلاردى دايارلاۋ باعىتتارىنىڭ سىنىپتاۋىشىن بەكىتۋ تۋرالى» ءبىلىم جانە عىلىم ءمينيسترىنىڭ 2018-جىلعى 13- قازانداعى 569№ بۇيرىعىنا سايكەس «ونەر جانە گۋمانيتارلىق عىلىمدار» ءبىلىم بەرۋ سالاسىنىڭ «تىلدەر مەن ادەبيەت» دايارلاۋ باعىتى اياسىندا «اۋدارما ءىسى» ءبىلىم بەرۋ باعدارلامالارىنىڭ توبى ىسكە اسىرىلۋدا. «ىلەسپە اۋدارما» ءبىلىم بەرۋ باعدارلاماسى بويىنشا ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى جانە ءال-فارابي اتىنداعى قازاق ۇلتتىق ۋنيۆەرسيتەتى ماماندار دايىندايدى.

«قازىرگى كەزدە قازاقستان رەسپۋبليكاسىنداعى ءتىل ساياساتىن دامىتۋدىڭ 2023-2029-جىلدارعا ارنالعان تۇجىرىمداماسىنىڭ جوباسى ازىرلەنۋدە. اتالعان تۇجىرىمداما بەكىتىلگەننەن كەيىن ونى ىسكە اسىرۋ جوسپارى اياسىندا ىلەسپە اۋدارماشىلاردى دايىنداۋ كۋرستارىن ۇيىمداستىرۋ ماسەلەسى قاراستىرىلاتىن بولادى. سونىمەن قاتار عىلىم جانە جوعارى ءبىلىم مينيسترلىگىنە ورتالىق مەملەكەتتىك ورگانداردا اۋدارما جۇمىسىنا بەيىمى بار مەملەكەتتىك قىزمەتشىلەر اراسىنان ىلەسپە اۋدارما پراكتيكاسى بويىنشا تاعىلىمدامادان وتەتىن مەملەكەتتىك قىزمەتشىلەر ءتىزىمىن قالىپتاستىرۋ تاپسىرىلدى. سونداي- اق مينيسترلىك الداعى ۋاقىتتا قازاقستان رەسپۋبليكاسى پارلامەنتى پالاتالارىنىڭ اپپاراتتارىندا ىلەسپە اۋدارما جاساۋ جانە زاڭ شىعارۋ ءىسىنىڭ اۋدارما جۇمىسى بويىنشا قىزمەتكەرلەردىڭ تاعىلىمدامادان ءوتۋ جۇمىستارىن ۇيلەستىرەتىن بولادى»، - دەدى ءاليحان سمايىلوۆ.