الماتى وبلىستىق پوليتسيا دەپارتامەنتىنىڭ بۇرىنعى باسشىسىنا حالىقارالىق ىزدەۋ جاريالاندى
«پروكۋراتۋرا قىرعىز رەسپۋبليكاسىنىڭ شەكارا قىزمەتىنەن العان اقپاراتقا سايكەس، كۇدەبايەۆ 23-ناۋرىز كۇنى بىشكەك قالاسىنداعى ماناس حالىقارالىق اۋەجايىنان تۇركيانىڭ ىستامبۇل قالاسىنا ۇشىپ كەتكەن. بۇل شەكارا قىزمەتىنىڭ دەرەكتەر بازاسىمەن دالەلدەنگەن. سوتتالۋشىنىڭ مۇنان ارى وزگە ەلدەرگە ءجۇرىپ- تۇرۋىنىڭ الدىن الۋ جانە تۇرعىلىقتى جەرىن انىقتاۋ ءۇشىن شۇعىل تۇردە كۇدەبايەۆقا حالىقارالىق ىزدەۋ جاريالاپ، وعان بۇلتارتپاۋ شاراسىن تۇتقىنعا الۋعا وزگەرتۋ قاجەت»، - دەدى الەۋمەتتىك جەلىدە تاراعان ۆيدەودا سۋديا.
تالدىقورعان قالالىق سوتىنىڭ Facebook پاراقشاسىندا جاريالانعان اقپاراتقا قاراعاندا، س. كۇدەبايەۆ اۋىرىپ قالۋىنا بايلانىستى بىرنەشە رەت سوت وتىرىسىنا كەلمەگەن.
ونىڭ اۋرۋحاناعا تۇسكەنىن دالەلدەيتىن انىقتامانى ادۆوكاتى سوتقا ۇسىنعان. وسىعان بايلانىستى سوت وتىرىسى كەيىنگى شەگەرىلىپ كەلدى.
2023 -جىلدىڭ 30- تامىزىندا سوت قىلمىستىق- پروتسەستىك كودەكستىڭ 157 جانە 355-باپتارىنا سايكەس، س. كۇدەبايەۆتى 3 -ءساۋىر كۇنى ساعات 10:00-دە سوتقا اكەلۋ تۋرالى قاۋلى شىعاردى.
پروكۋرور كۇدىكتىنى الىپ كەلۋ تۋرالى قاۋلىنى ورىنداۋ بارىسىندا س. كۇدەبايەۆتىڭ ەلدەن كەتىپ قالعانى تۋرالى مالىمەت ۇسىندى.
«بۇگىنگى تاڭدا قىلمىستىق- پروتسەستىك كودەكستىڭ 324-بابىنا سايكەس، ءىس ىزدەۋ جاريالانۋىنا بايلانىستى توقتاتىلدى. ءىس ىزدەۋدى قاداعالاۋ ءۇشىن جەتىسۋ وبلىستىق پروكۋراتۋراسىنا جىبەرىلدى»، - دەلىنگەن سوت حابارلاماسىندا.
ەسكە سالساق، الماتى وبلىستىق پوليتسيا دەپارتامەنتىنىڭ بۇرىنعى باسشىسى سەرىك كۇدەبايەۆ قاڭتار وقيعاسى بويىنشا كۇدىكتى دەپ تانىلعان ەدى.
سوت تالقىلاۋى بارىسىندا پروكۋرور سۋديادان سەرىك كۇدەبايەۆقا 9 جىلعا باس بوستاندىعىنان ايىرۋ جازاسىن تاعايىنداۋدى سۇراعان بولاتىن.
اۆتور
مارلان جيەمباي
