رەسەيدەن زاڭسىز جولمەن كولىك اكەلگەندەر ۇستالدى

كوكشەتاۋ. قازاقپارات - اقمولا وبلىسىندا ءبىر توپ ازامات ۇرلانعان كولىك قۇرالدارىن تىركەۋ جانە ساتۋمەن اينالىسقان، دەپ حابارلايدى قازاقپارات.

قارجىلىق مونيتورينگ اگەنتتىگىنىڭ وڭىردەگى دەپارتامەنتى 2020-2021 -جىلدار ارالىعىندا رەسەي فەدەراتسياسىنان قازاقستانعا زاڭسىز جولمەن كولىك قۇرالدارىن اكەلگەن ازاماتتاردىڭ ارەكەتىن اشكەرەلەدى.

«اتالعان ازاماتتار الدىن الا كەلىسىم بويىنشا ىزدەۋدەگى كولىكتەردى رەسەي فەدەراتسياسىنىڭ اۋماعىندا ساتىپ الىپ، كەيىننەن ولارعا جالعان قۇجاتتار جاساپ، سونىڭ نەگىزىندە شەكارادان ءىس جۇزىندە وتپەي قازاقستان اۋماعىندا تىركەگەن. قۇجاتتاردى جانە مەملەكەتتىك تىركەۋ ءنومىرىن العان سوڭ، شەكارادان ءوتىپ، ساتىپ وتىرعان»، - دەپ جازدى ۆەدومستۆودان.

سوت ۇكىمىمەن ءۇش ازامات 8، 7 جانە 6 جىلعا باس بوستاندىقتارىنان ايىرىلدى (ۇكىم زاڭدى كۇشىنە ەنگەن جوق).