ۇلەسكەرى جوق، بەيبەرەكەت سالىنىپ جاتقان تۇرعىن ۇيلەردىڭ قۇرىلىسىن توقتاتامىز - استانا اكىمى

استانا. قازاقپارات - استانا اكىمى جەڭىس قاسىمبەك ب ا ق وكىلدەرىنە تالدىكول اۋماعىنداعى بەيبەرەكەت قۇرىلىسپەن قالاي كۇرەسەتىنىن ايتتى، دەپ حابارلايدى قازاقپارات ءتىلشىسى.

«بەيبەرەكەت قۇرىلىستارعا كەلسەك، كورشىلەس تۇرعىن ءۇي كەشەننىڭ تۇرعىندارى مەن بەلسەندىلەر شاعىم ايتىپ جۇرگەن 20 داي نىسان بار. وسى نىسانداردىڭ ءارقايسىسى بويىنشا جوسپار بار. باستاماشىل توپتاردىڭ بارىمەن ۇدايى كەزدەسىپ وتىرامىز. اتالعان نىسانداردىڭ شامامەن 70 پايىزى بويىنشا ناقتى شەشىم بار. قۇرىلىس يەلەرىمەن، تۇرعىندارمەن كەلىسىپ جاتىرمىز. نەگىزىنەن قۇرىلىس ءتۇسۋى كەرەك ورىندارعا الەۋمەتتىك نىساندار سالامىز. بىرنەشە قاباتى كوتەرىلىپ كەتكەن، ۇلەسكەرى بار نىساندار بويىنشا سوت بولىپ جاتىر. سوت شەشىمىنە قاراي تۇپكىلىكتى شەشىم قابىلدانادى. ونداي نىساندار بويىنشا دا جىل اياعىنا دەيىن شەشىم شىعارامىز دەپ ويلايمىن»، - دەدى اكىم.

ونىڭ ايتۋىنشا، كەيبىر نىسانداردىڭ قابات سانى وزگەرتىلۋى مۇمكىن.

«جالپى شەشىمدەر بار، كەلىسىپ جاتىرمىز. ەكى تاراپتىڭ دا كوڭىلىنەن شىعاتىن شەشىم بولادى دەپ ويلايمىن. ال ۇلەسكەرى جوق ىعى-جىعى قۇرىلىستار توقتاتىلادى. بولاشاق تۇرعىندارى بەلگىلى بولىپ قويعان كەشەندەر بويىنشا ورتاق شەشىمىن تابامىز - قابات سانىن ازايتامىز، تاراپتاردىڭ ءبارىنىڭ كوڭىلىن تاباتىنداي باسقا دا زاڭدى تاسىلدەرىن ويلاستىرامىز»، - دەدى جەڭىس قاسىمبەك.