استانادا الدەبىرەۋ پىشاقتاپ كەتكەن مەشىت قىزمەتكەرى اۋرۋحانادان شىقتى

استانا. قازاقپارات - ەلوردادا بىرنەشە جەردەن پىشاق جاراقاتىن العان مەشىت قىزمەتكەرى اۋرۋحانادان شىعارىلدى، دەپ حابارلايدى قازاقپارات قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتىنە سىلتەمە جاساپ.

«پاتسەنت جازىلىپ ۇيىنە شىقتى، ءوزىن جاقسى سەزىنەدى. ونىڭ تولىق قالپىنا كەلۋىنە ءبىراز ۋاقىت كەرەك»، - دەيدى №3-قالالىق كوپبەيىندى اۋرۋحانانىڭ ەمدەۋشى دارىگەرى، حيرۋرگ ارمان سارقىتباي.

ءوز كەزەگىندە پاتسيەنت مۇسلۋحاددين نادىروۆ اۋرۋحانا باسشىلىعى مەن دارىگەرلەرگە ريزاشىلىعىن جەتكىزدى.

«مەنى اۋرۋحاناعا 14 جەردەن پىشاق جاراقاتىمەن، ەس-ءتۇسسىز الىپ كەلدى. دارىگەرلەر جانىمدى امان الىپ قالدى. حيرۋرگيا ءبولىمىنىڭ جەتەكشىسى سەرگەي ۆەرۆەين مەن ەمدەۋشى دارىگەر ارمان سارقىتبايعا العىسىم شەكسىز»، - دەيدى جازىلىپ شىققان مەشىت قىزمەتكەرى.

ەسكە سالا كەتەيىك، 15-ناۋرىزدا استاناداعى مەشىتتەردىڭ بىرىندە شارۋاشىلىق قىزمەتكەرىن بىرەۋ پىشاقتاپ كەتتى.

بۇل تۋرالى قازاقستان مۇسىلماندارى ءدىني باسقارماسىنىڭ باسپا ءسوز حاتشىسى اعابەك قونارباي ۇلى ءمالىم ەتكەن ەدى.

كەيىن بولعان وقيعاعا قالالىق پوليتسيا دەپارتامەنتى جانە قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتى تۇسىنىك بەردى.

«14-ناۋرىزدا جەدەل جاردەم بريگاداسى ناۋقاستى №3-كوپبەيىندى قالالىق اۋرۋحاناعا جەتكىزدى. پاتسەنت بىرنەشە جەردەن پىشاق جاراقاتىن العان، جاعدايى اۋىر. ناۋقاسقا شۇعىل ەم جۇرگىزىلدى. قازىر ناۋقاستىڭ جاعدايى وتە اۋىر. پاتسيەنتتى امان الىپ قالۋ ماقساتىندا رەانيماتسيا جانە ينتەنسيۆتى تەراپيا بولىمىندە ەم جالعاسىپ جاتىر»، - دەگەن حابار العان ەدىك ەلوردانىڭ دەنساۋلىق ساقتاۋ باسقارماسىنان.

اۆتور

داۋلەت ىزتىلەۋ