ەرلان قارين پرەزيدەنتتىڭ سوزىندەگى نەگىزگى مەسسەدجدەردى اتادى

استانا. قازاقپارات - مەملەكەتتىك كەڭەسشى ەرلان قارين پرەزيدەنتتىڭ سوزىندەگى نەگىزگى مەسسەدجدەردى اتادى، دەپ حابارلايدى قازاقپارات.

«پرەزيدەنتتىڭ بۇگىنگى سويلەگەن سوزىندە مىناداي نەگىزگى مەسسەدجدەر بولدى:

1. ساياسي رەفورمالار جالعاسادى، ساياسي جۇيە ودان ءارى جاڭعىرتىلا بەرەدى.

2. قازاقستان - دامۋدىڭ جاڭا ءۇردىسىن قالىپتاستىرىپ، تۇبەگەيلى رەفورما جۇرگىزىپ جاتقان گەوساياسي توڭىرەكتەگى بىردەن-ءبىر مەملەكەت.

3. مەملەكەت باسشىسى ءوزىنىڭ سوزىندە العاش رەت Amanat پارتياسىن عانا ەمەس، پارلامەنتكە وتكەن باسقا دا پارتيالاردى اتاپ ءوتتى. وسىلايشا، پارتيالاردان دەربەس تۇرعان ساياسي تورەشى مارتەبەسىن تاعى ءبىر رەت كورسەتتى.

4. مەملەكەتتىڭ باستى نازارى وزەكتى ەكونوميكالىق ماسەلەلەردى شەشۋ جاعىنا ويىسادى.

5. شاعىن جانە ورتا بيزنەستى دامىتۋ ءىسى ەندى مەملەكەتتىڭ ەكونوميكالىق ساياساتىنىڭ وزەگىنە اينالادى.

6. بارلىق الەۋمەتتىك توپ وكىلدەرىنە قاتىستى مەملەكەتتىك قولداۋ شارالارىنا توقتالعان پرەزيدەنت ءوزىنىڭ ساياسي باعدارىندا الەۋمەتتىك ماسەلەلەرگە باسا ءمان بەرەتىنىن ايقىن اڭعارتتى.

7. پرەزيدەنت ۇزاق مەرزىمگە ارنالعان ستراتەگيالىق جوسپارلاۋعا قاتىستى ۇستانىمداردى جاھاندىق ۇدەرىستەردى ەسكەرە وتىرىپ، قايتا قاراۋدى ۇسىندى.

ەڭ باستىسى، پرەزيدەنت باستى ماقساتىنا جەتۋ، ياعني حالىقتىڭ ءال-اۋقاتىن ارتتىرىپ، ۇلتتىڭ جاڭا ساپاسىن قالىپتاستىرۋ جولىندا ءوزى بۇعان دەيىن ۇسىنعان نەگىزگى قاعيداتتارعا ارقا سۇيەيدى. بۇل قاعيداتتار - زاڭ ۇستەمدىگى، ەل بىرلىگى، الەۋمەتتىك جاۋاپكەرشىلىك جانە ىشكى ساياسي تۇراقتىلىق»، - دەپ جازدى ەرلان قارين.