ءماجىلىس ءتوراعاسىنىڭ ورىنباسارلارى سايلاندى

استانا. قازاقپارات - ءماجىلىستىڭ جالپى وتىرىسى بارىسىندا پالاتا ءتوراعاسىنىڭ ەكى ورىنباسارى سايلاندى، دەپ حابارلايدى قازاقپارات ءتىلشىسى.

«ق ر پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭى 9-بابى 8-تارماعىنا سايكەس، پالاتا دەپۋتاتتارى اراسىنان ءماجىلىس ءتوراعاسىنىڭ ۇسىنۋىمەن پالاتا دەپۋتاتتارى جالپى سانىنىڭ كوپشىلىك داۋىسىمەن سايلاناتىن 2 ورىنباسارى بولادى. سوندىقتان وزىمە بەرىلگەن قۇقىقتى پايدالانا وتىرىپ، پارلامەنت ءماجىلىسى ءتوراعاسىنىڭ ورىنباسارى لاۋازىمىنا الدىمەن ءماجىلىس دەپۋتاتى البەرت راۋدىڭ كانديداتۋراسىن ۇسىنامىن»، - دەدى ءماجىلىس ءتوراعاسى ەرلان قوشانوۆ پالاتانىڭ جالپى وتىرىسى بارىسىندا.

داۋىس بەرۋ بارىسىندا وتىرىسقا قاتىسقان 97 دەپۋتاتتىڭ 96 سى البەرت راۋدىڭ كانديداتۋراسىن قولداپ، 1 دەپۋتات قالىس قالدى.

وسىدان كەيىن ءماجىلىس ءتوراعاسى 2-ورىنباسارى لاۋازىمىنا دانيا ەسپايەۆانىڭ كانديداتۋراسىن ۇسىندى.

«دانيا ءمادي قىزى تاجىريبەلى ەكونوميست. كوپ جىل باسشىلىق قىزمەتتە، بانك سەكتورىندا جۇمىس ىستەدى. 7-سايلانىمداعى قارجى جانە بيۋدجەت كوميتەتىنىڭ حاتشىسى بولىپ، زاڭ شىعارۋ قىزمەتىنە بەلسەنە اتسالىستى. ءوزىن كاسىبي مامان رەتىندە كورسەتە ءبىلدى»، - دەدى ەرلان قوشانوۆ.

دانيا ەسپايەۆانىڭ كانديداتۋراسىن 94 دەپۋتات قولدادى، ءبىر دەپۋتات داۋىس بەرگەن جوق، 2 دەپۋتات قالىس قالدى.