جاڭا سايلانعان ءماجىلىس دەپۋتاتتارى انت بەردى
«قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ تۇتاستىعى مەن تاۋەلسىزدىگىن نىعايتۋعا، ونىڭ كونستيتۋتسياسى مەن زاڭدارىنا قاتاڭ باعىنۋعا، دەپۋتاتتىڭ وزىمە جۇكتەلگەن مارتەبەلى مىندەتتەرىن ادال اتقارۋعا انت ەتەمىن»، - دەلىنگەن انت ماتىنىندە.
بۇعان دەيىن VIII سايلانعان ءماجىلىس دەپۋتاتتارىنىڭ تولىق ءتىزىمى جاريالانعان بولاتىن.
19-ناۋرىز كۇنى وتكەن ءماجىلىس دەپۋتاتتارىن سايلاۋعا ەلىمىزدە رەسمي تىركەلگەن 7 پارتيانىڭ بارلىعى قاتىستى. ولاردىڭ ىشىندە تەك «بايتاق» پارتياسى عانا شەكتى 5 پايىزدىق مەجەدەن اسا المادى. ال، «Amanat» پارتياسى سايلاۋشىلاردىڭ - 53,90، «اۋىل» حالىقتىق-دەموكراتيالىق پارتياسى - 10,90، «Respublica» پارتياسى - 8,59، «اق جول» قازاقستان دەموكراتيالىق پارتياسى - 8,41، «قازاقستان حالىق پارتياسى» - 6,8، «جالپى ۇلتتىق سوتسيال-دەموكراتيالىق پارتياسى» 5,20 پايىز داۋىسىن جينادى. وسىلايشا، 5 جانە ودان دا كوپ پايىز داۋىس جيناعان ساياسي پارتيالاردىڭ اراسىندا «Amanat» پارتياسىنا - 40 ماندات، «اۋىل» حالىقتىق- دەموكراتيالىق پارتياسى - 8 ماندات، «Respublica» پارتياسى - 6 ماندات، «اق جول» قازاقستان دەموكراتيالىق پارتياسى - 6 ماندات، «قازاقستان حالىق پارتياسى» - 5 ماندات، «جالپى ۇلتتىق سوتسيال- دەموكراتيالىق پارتياسىنا» 4 ماندات بۇيىردى.
