بالا اتا- اناسىنا نەنى ايتا المايدى؟
پسيحوتەراپيەۆت تەراپياعا كەلگەن ءار كليەنتتىڭ ءوز اتا-اناسىنا بالا كەزىندە ايتا الماعاندارىن جيناقتاپ، قىسقاشا كەلتىرىپ كەتكەن:
«مەنىمەن ويناشى. اقىل ايتپا، ۇيرەتپە ءجاي عانا ويناشى. ءومىر بويى ەستە قالاتىن جاعىمدى ەستەلىگىم اكە-شەشەممەن اسىر ساپ ويناعانىم، ويناعاندا سەزىنگەن كوڭىل-كۇيىم بولماق»؛
«مەنى تەك ءتارتىپتى، اقىلدى بولعانىمدا عانا اينالىپ تولعانباشى. تەنتەكتىك جاساسام دا، قىرسىعىپ ەركەلەسەم دە اينالىپ تولعانشى. سوندا عانا مەن اكە-شەشەمە قانداي بولسام دا كەرەكپىن، ولار مەنى قالاي بارمىن سولاي قابىلدايدى دەپ وسەمىن. ەرەسەك ومىرىمدە دە وزگەلەرمەن قابىلدانامىن»؛
«قۇشاعىڭا قىسىپ قۇشاقتاشى. شارتسىز جاقسى كورەتىنىڭدى سەزدىرشى. قورعانىستا ەكەنىمدى، ءوز سەزىمىمدى اشىق كورسەتىپ، قاۋىپسىز ورتام بار ەكەنىن سەزىپ، ءبىلىپ وسەمىن. سەنىمدى بولامىن»؛
«مەنى اجەممەن قالدىرماشى. اجەم ۇرسادى، تىلدەيدى، سەندەردى جاماندايدى. اكە-شەشەڭ جامان دەگەندى ەستۋ «سەن دە جامانسىڭ» دەگەنمەن پارا-پار. جامان بولعىم كەلمەيدى»؛
«مەن قۋانىپ ءوز اڭگىمەمدى ايتىپ جاتىرسام تىڭداڭىزدارشى. بولمەي، سىناماي، مازاق ەتپەي. تىڭدالماي قالۋ سونداي قيىن، كەيىن مەن مۇلدەم ەشتەڭەمەن بولىسكىم كەلمەيدى. كەيىن ەرەسەك شاعىمدا «نەگە ۇندەمەيسىڭ، نەگە پىسىق بولمايسىڭ» دەگەندى ەستىمەسپىن، بالكىم»؛
«سەن ءۇشىن اكەڭە شىدادىم. سەن ءۇشىن اكەڭە ءتوزدىم دەگەندى ايتا كورمەڭىزشى. اكەممەن باقىتسىز بولعانىڭىز ءۇشىن ءومىر بويى ءوزىمدى كىنالى سانارمىن-اۋ»؛
«ناعاشىلارىم «اكەڭ جامان، اكەڭ قۋ» دەگەن سوزدەردى ايتپاسا ەكەن. اكەم وزىمە التىن بولعاندىقتان، ول التىندى سىرتتاي جامانداعانىن ەستۋ اۋىر. مەن دە قۋمىن با دەگەن وي پايدا بولار»؛
«نەگە ەكەۋىڭ ءبىر وتباسى بوپ، بىرىگىپ بالا سۇيە تۇرا قىرىق پىشاق بوپ بولىنەسىڭدەر؟ ءارقايسىڭ ءوز تۋىسىڭدى ماقتاپ، ءبىر-ءبىرىڭنىڭ تۋىسىڭدى داتتاپ»؛
⠀«ۇرىسىپ، توبەلەسۋدى دوعارىڭدارشى، وتىنەمىن، جالىنامىن».